जळगाव ( प्रतिनिधी ) – जळगाव – भुसावळ राष्ट्रीय महामार्गावरील हॉटेल जान्हवी समोर पायी जाणाऱ्या एका माणसाला वाहनाने जोरदार धडक दिली होती. त्या माणसाचा उपचारादरम्यान मृत्यू झाला होता. या घटनेप्रकरणी मंगळवारी अज्ञात वाहन चालकाविरोधात शनिपेठ पोलीस स्टेशनला गुन्हा दाखल करण्यात आला आहे.
याबाबत अधिक माहिती अशी की, राष्ट्रीय महामार्ग क्रमांक सहाच्या जळगाव भुसावळ रोडवरील हॉटेल जानवी समोरून १३ ऑक्टोबर रोजी सकाळी साडेनऊ वाजता एक अनोळखी मनुष्य पायी जात होता. त्यावेळी मागून येणाऱ्या एका अज्ञात भरधाव वाहनाने त्यांना धडक दिली. या धडकेत अनोळखी मनुष्य गंभीर जखमी झाला होता. त्याला जिल्हा शासकीय वैद्यकीय महाविद्यालयात उपचारार्थ दाखल करण्यात आले होते. त्यानंतर या अनोळखी माणसाचा २५ ऑक्टोबर रोजी उपचारादरम्यान मृत्यू झाला. याप्रकरणी सुरुवातीला शनिपेठ पोलीस स्टेशनला अकस्मात मृत्यूची नोंद करण्यात आली होती. या घटनेचे सखोल चौकशी केल्यानंतर शनिपेठ पोलीस स्टेशनचे सहायक फौजदार संजय एकनाथ शेलार यांच्या फिर्यादीवरून मंगळवारी २२ नोव्हेंबर रोजी दुपारी अडीच वाजता अज्ञात वाहन चालका विरोधात शनीपेठ पोलीस स्टेशनला गुन्हा दाखल करण्यात आला आहे. पुढील तपास सहायक पोलीस निरीक्षक रमेश चव्हाण करीत आहे.