सातारा (वृत्तसंस्था) – करोनाच्या संकटामुळे राज्य सरकारने शिवजयंती साजरी करण्यावर निर्बंध आणले आहेत. छत्रपती शिवाजी महाराज म्हणजे संपूर्ण देशाची अस्मिता आहे. त्यामुळे त्यांची जयंती साजरी झाली पाहिजे, त्याच वेळी लोकांचीही काळजी घेणे, ही शासनाची व आपल्या सर्वांची जबाबदारी आहे, असे मत खा. उदयनराजे भोसले यांनी व्यक्त केले.
करोनाचे संकट कायम असल्याने राज्य सरकारने शिवजयंती साजरी करण्यावर निर्बंध आणले आहेत. गेले काही महिने विविध मुद्द्यांवरून सरकारवर टीका करणाऱ्या विरोधकांना आणखी एक मुद्दा मिळाला आहे. याच मुद्द्यावरून भाजप आणि मनसेने सरकारवर टीका केली आहे; परंतु खा. उदयनराजे भोसले यांनी वेगळे मत मांडले आहे.
ग्रेड सेपरेटरच्या हस्तांतरणप्रसंगी पत्रकारांनी विचारलेल्या प्रश्नावर खा. उदयनराजे म्हणाले, करोनामुळे अनेकांनी आपल्या जवळचे लोक, कुटुबातील घटक, नातेवाइक गमावले आहेत. छत्रपती शिवाजी महाराज म्हणजे आपल्या देशाची अस्मिता आहे. त्यांची जयंती साजरी झालीच पाहिजे; परंतु त्याचबरोबर आपल्या लोकांची काळजी घेणे, ही शासनाची आणि आपल्या सर्वांचीच जबाबदारी आहे. छत्रपती शिवाजी महाराज आज असते, तर त्यांनीसुद्धा असाच विचार केला असता. त्यांनी रयतेला नेहमी तळहातावरील फोडाप्रमाणे जपले होते. त्यामुळे शिवजयंती जरूर साजरी करा, पण स्वतःची काळजीसुद्धा घ्या.
उदयनराजे यांनी नुकतीच नवी दिल्लीत राष्ट्रवादी कॉंग्रेसचे सर्वेसर्वा शरद पवार यांची भेट घेऊन मराठा आरक्षणाच्या विषयात लक्ष घालण्याची विनंती केली होती. त्यासंदर्भात विचारले असता, चर्चेतून मार्ग निघेल, अशी खात्री मला आहे, असे उदयनराजे यांनी सांगितले.
दरम्यान, तब्बल 76 कोटी खर्च करून उभारलेल्या ग्रेड सेपरेटरचे हस्तांतरण सार्वजनिक बांधकाम विभागाकडून सातारा पालिकेकडे करण्यात आले. राहुल अहिरे यांनी ग्रेड सेपरेटरची फाइल अभिजित बापट यांच्याकडे दिली. ग्रेड सेपरेरटर अत्यंत देखणा झाला आहे. याशिवाय शिवतीर्थाच्या विकासासाठी जिल्हा नियोजन समितीकडून अडीच कोटी रुपये दिले जाणार असल्याचे उदयनराजे म्हणाले.
सातारा येथील पोवई नाक्यावर उभारण्यात आलेल्या ग्रेड सेपरेटरचे हस्तांतरण सातारा पालिकेकडे रविवारी करण्यात आले. त्यावेळी ते बोलत होते. नगराध्यक्ष सौ. माधवी कदम, उपनगराध्यक्ष मनोज शेंडे, साविआचे पक्षप्रतोद ऍड. दत्ता बनकर, बांधकाम समिती सभापती सिध्दी पवार, नियोजन समिती सभापती स्नेहा नलावडे, पाणीपुरवठा समिती सभापती सीता हादगे, आरोग्य समिती सभापती अनिता घोरपडे, नगरसेवक किशोर शिंदे, राजू भोसले, सुहास राजेशिर्के, सार्वजनिक बांधकाम विभागाचे कार्यकारी अभियंता राहुल अहिरे, पालिकेचे मुख्याधिकारी अभिजित बापट, नगरसेवक व मान्यवर उपस्थित होते.