घरातून लॅपटॉप, दोन मोबाईल व रोकड लंपास; रामानंदनगर पोलिस ठाण्यात गुन्हा दाखल
जळगाव : शहरातील टेलिफोन नगर परिसरात सेवानिवृत्त व्यक्तीच्या घरात प्रवेश करून अज्ञात चोरट्याने लॅपटॉप, दोन मोबाईल आणि रोकड असा एकूण ४७ हजार रुपये किमतीचा ऐवज लंपास केल्याची घटना समोर आली आहे. याप्रकरणी रामानंदनगर पोलिस ठाण्यात अज्ञात चोरट्याविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, प्लॉट क्रमांक १९ बी, टेलिफोन नगर, पुष्पक निवास, जळगाव येथे चंद्रसिंग जानराव मोरे (वय ५७, व्यवसाय-सेवानिवृत्त) हे वास्तव्यास आहेत. १० ऑगस्ट रोजी सकाळी ७.३० ते ८.२० वाजेदरम्यान ते घरात नसल्याची संधी साधून अज्ञात चोरट्याने घरात प्रवेश केला.
चोरट्याने घरातील मौल्यवान वस्तू व रोकड लबाडीने चोरून नेली. याप्रकरणी चंद्रसिंग मोरे यांनी दिलेल्या फिर्यादीवरून १२ ऑगस्ट रोजी रात्री ९.३४ वाजता रामानंदनगर पोलिस ठाण्यात गुन्हा दाखल करण्यात आला.
लॅपटॉपसह तीन मोबाईल लंपास
चोरीला गेलेल्या ऐवजात २० हजार रुपये किमतीचा Lenovo कंपनीचा लॅपटॉप, १० हजार रुपये किमतीचा iQOO Neo 6 मोबाईल, ८ हजार रुपये किमतीचा Narzo 70 Pro मोबाईल आणि ९ हजार रुपये रोकड, असा एकूण ४७ हजार रुपयांचा मुद्देमाल आहे.
या प्रकरणी भारतीय न्याय संहितेच्या कलम ३०५(अ) नुसार चोरीचा गुन्हा दाखल करण्यात आला आहे. अज्ञात आरोपीचा शोध सुरू असून, पुढील तपास पोलीस हवालदार सुशील चौधरी करीत आहेत.
