दहशत माजविण्यासाठी गावठी पिस्तुल घेऊन फिरणारा जेरबंद

कुसुंबा विमानतळ शिवारात एमआयडीसी पोलिसांची कारवाई; राजकिरण परदेशीकडून गावठी पिस्तुल जप्त

जळगाव : दहशत निर्माण करण्याच्या उद्देशाने विना परवाना गावठी पिस्तुल घेऊन फिरणाऱ्या तरुणाला एमआयडीसी पोलिसांनी जेरबंद केले. राजकिरण मानसिंग परदेशी (वय २६, रा. रायपूर, ता. जळगाव) असे ताब्यात घेण्यात आलेल्या संशयिताचे नाव आहे. ही कारवाई ११ ऑगस्ट रोजी दुपारी कुसुंबा येथील विमानतळ शिवारात करण्यात आली.

कुसुंबा शिवारातील विमानतळ परिसरात एक तरुण गावठी पिस्तुल घेऊन दहशत माजवत असल्याची माहिती एमआयडीसी पोलिस ठाण्याचे निरीक्षक बबन आव्हाड यांना मिळाली. त्यांनी गुन्हे शोध पथकाला तातडीने कारवाईच्या सूचना दिल्या.

पोलिस पथकाने संशयित राजकिरण परदेशी याला ताब्यात घेतले. त्याची कसून चौकशी व झडती घेतली असता त्याच्याकडे गावठी पिस्तुल आढळून आले. कोणताही परवाना नसताना शस्त्र बाळगल्याप्रकरणी पोलिसांनी त्याच्यावर कारवाई केली.

याप्रकरणी पोलिस अंमलदार किरण पाटील यांनी दिलेल्या फिर्यादीवरून एमआयडीसी पोलिस ठाण्यात गुन्हा दाखल करण्यात आला आहे. पुढील तपास सफौ विजयसिंग पाटील करीत आहेत.