रुमाली रोटी बनविणाऱ्या दुकानावर छापा; दोन अल्पवयीन मुलांकडून काम करून घेतल्याप्रकरणी गुन्हा दाखल
यावल ( प्रतिनिधी ) – यावल शहरातील चोपडा रोडवरील ख्वाजा मशिदीसमोरील रुमाली रोटी (मांडे) तयार करणाऱ्या दुकानावर पोलिसांनी कारवाई करत बालमजुरीचा गंभीर प्रकार उघडकीस आणला आहे. दोन अल्पवयीन मुलांकडून काम करून घेतल्याप्रकरणी दोन जणांविरुद्ध गुन्हा दाखल करण्यात आला असून या घटनेमुळे परिसरात खळबळ उडाली आहे.
पोलिसांनी दिलेल्या माहितीनुसार, दि. १२ जून २०२६ रोजी दुपारी सुमारे २ वाजेच्या सुमारास यावल शहरातील संबंधित दुकानाची तपासणी करण्यात आली. या वेळी तेथे दोन अल्पवयीन मुलांकडून काम करून घेतले जात असल्याचे निदर्शनास आले.
कारवाईदरम्यान पोलिसांना खालील अल्पवयीन मुले काम करताना आढळून आली. शेख अबरार शेख अफसर (वय १२ वर्षे, रा. डांगपुरा, यावल), रेहान शेख नईमुद्दीन (वय १३ वर्षे, रा. किल्लाजवळ, यावल) या मुलांकडून रुमाली रोटी तयार करण्याच्या कामासाठी मजुरी करून घेतली जात असल्याचे तपासात समोर आले.
या प्रकरणी पोलिसांनी आसिफ खान शमसुद्दीन खान कुरेशी (वय २४, रा. अक्सानगर, यावल), अजीम साहेब (वय ३३, रा. डांगपुरा, यावल) यांच्याविरुद्ध गुन्हा नोंदविला आहे.
तपासादरम्यान संबंधित अल्पवयीन मुलांना नियमित वेतन देण्यात येत नसल्याचे, त्यांच्यासाठी कोणतीही सुरक्षितता साधने उपलब्ध करून देण्यात आली नसल्याचे आढळले. तसेच हजेरीपत्रक, वेतन नोंदी किंवा विमा संरक्षणासंदर्भातील कोणतीही कागदपत्रे उपलब्ध नसल्याची माहिती पोलिसांनी दिली.
मुलांचे शोषण केल्याप्रकरणी आरोपींविरुद्ध भारतीय न्याय संहिता कलम १४६, बाल कामगार (प्रतिबंध व नियमन) अधिनियम कलम ३ व १४(१) तसेच बाल न्याय (काळजी व संरक्षण) अधिनियम २०१५ चे कलम ७९ अन्वये गुन्हा दाखल करण्यात आला आहे.
याप्रकरणी यावल पोलीस ठाण्यात गुन्हा दाखल करण्यात आला असून पुढील तपास पोलीस हेड कॉन्स्टेबल राजेंद्र पवार करीत आहेत. अद्याप कोणालाही अटक करण्यात आलेली नसून तपास सुरू आहे.
बालमजुरीविरोधात शासनाने कठोर कायदे लागू केले असतानाही अशा घटना समोर येत असल्याने प्रशासनाने अधिक प्रभावी तपासणी मोहीम राबविण्याची गरज व्यक्त होत आहे.
