मारहाण, शिवीगाळ करून शारीरिक व मानसिक त्रास दिल्याचा आरोप
जळगाव (प्रतिनिधी) – माहेरहून पैसे आणण्याच्या मागणीवरून विवाहितेचा पती, सासू, जेठ व जेठाणी यांनी वारंवार छळ केल्याचा आरोप करत रामानंदनगर पोलिस ठाण्यात चौघांविरुद्ध गुन्हा दाखल करण्यात आला आहे. या प्रकरणी भारतीय न्याय संहितेच्या कलम ८५, ११५(२), ३५२, ३५१(२), ३(५) अन्वये कारवाई करण्यात आली आहे.
पोलिसांनी दिलेल्या माहितीनुसार, फिर्यादी महिला सध्या अमळनेर तालुक्यातील गांधीपुरा, शासकीय दवाखान्याच्या पाठीमागे, आंबेडकर चौक परिसरात राहत आहे. तिच्या तक्रारीनुसार, दि. २७ फेब्रुवारी २०१९ पासून सासरी नांदत असताना पती दिलीप भिमराव हातगडे, जेठ भास्कर भिमराव हातगडे, जेठाणी रंजना शिवदास हातगडे आणि सासू सरूबाई भिमराव हातगडे, सर्व रा. आंबेडकर चौक, गांधीपुरा, शासकीय दवाखान्याच्या पाठीमागे, ता. अमळनेर, जि. जळगाव, यांनी माहेरहून पैसे आणण्याची मागणी केली.
पैसे आणण्याच्या कारणावरून आरोपींनी फिर्यादीला वेळोवेळी त्रास देत शिवीगाळ केली तसेच चापट्या-बुक्क्यांनी मारहाण केल्याचा आरोप आहे. तसेच शारीरिक व मानसिक छळ करून तिला त्रास दिल्याचे फिर्यादीत नमूद करण्यात आले आहे.
या प्रकरणी विवाहितेने दिलेल्या फिर्यादीवरून रामानंदनगर पोलिस ठाण्यात सीसीटीएनएस गुन्हा रजिस्टर क्रमांक २७६/२०२६ अन्वये गुन्हा दाखल करण्यात आला आहे. गुन्हा दि. २९ सप्टेंबर २०२६ रोजी सायंकाळी ५.१८ वाजता नोंदविण्यात आला.
या प्रकरणाचा पुढील तपास पोहेकॉ/७०० सुधाकर अंभोरे, रामानंदनगर पोलिस ठाणे, जळगाव करीत आहेत. गुन्ह्यातील आरोपींना अद्याप अटक झालेली नसल्याचे नोंदीत नमूद आहे.
