जामनेर तालुक्यात झाला भीषण अपघात
जामनेर (प्रतिनिधी) :- समोरुन येणाऱ्या अज्ञात वाहनाने तीन वाहनांना कट मारल्याने झालेल्या विचित्र अपघातात तीन जण ठार तर तीन जण जखमी झाल्याची घटना शुक्रवारी उघड झाली आहे. याप्रकरणी जामनेर पोलीस स्टेशनला घटनेची नोंद करण्यात आली आहे.
अपघाताची ही भीषण घटना जामनेर – बोदवड रस्त्यावरील मालदाभाडीनजीक शुक्रवारी रात्री ८ वाजेच्या सुमारास घडली. मृतांमध्ये वाडीकिल्ला ता. जामनेर येथील जि.प. शाळेचे मुख्याध्यापक ईश्वर त्र्यंबक पारधी (४२, रा.मालदाभाडी, ता.जामनेर), सुनिल शांताराम भोई (४५, रा. जामनेर रोड, बोदवड) आणि दत्तू रामा माळी (३०, रा. माळी वाडा, बोदवड) यांचा समावेश आहे. सुनील भोई आणि दत्तू माळी हे दुचाकीने जामनेरहून बोदवडकडे निघाले होते. त्याच्यामागे ईश्वर पारधी हे ही दुचाकीने मालदाभाडीकडे निघाले होते. मालदाभाडीनजीक समोरुन येणाऱ्या अज्ञात वाहनाने या दोन्ही दुचाकी आणि त्यांच्यामागे असलेल्या चारचाकी वाहनाला कट मारला.
यामुळे दुचाकी बाजूला फेकल्या गेल्या आणि त्या एकमेकांवर आदळल्या. यात वरील तीनही जण जागीच ठार झाले. याचवेळी चारचाकी वाहनावरील चालकाचे नियंत्रण सुटल्याने तीही रस्त्याच्या बाजूला जाऊन कोसळली. यात चारचाकीतील तीन जण जखमी झाले आहेत. ते पुण्याहून घाणखेड ता. बोदवडकडे निघाले होते. या पाठोपाठ एक पीकअप व्हॅन या रस्त्याने जात होती. त्यावरील चालकाने हा अपघात पाहिला आणि त्याचेही वाहनावरील नियंत्रण सुटले आणि वाहन रस्त्याच्या बाजूला जाऊन पडले. सुदैवाने यात कुणालाही इजा झाली नाही. यात वाहनात पाच ते सहा महिला होत्या.
अपघाताची माहिती मिळताच जामनेर येथून जालमसिंग राजपूत रुग्णवाहिकेसह अपघातस्थळी पोहचले. मालदाभाडी, नवीदाभाडी व वाडीकिल्ला येथील ग्रामस्थांनी मदतकार्य केले. तीनही मृतदेह रात्री जामनेर येथील उपजिल्हा रुग्णालयात आणण्यात आले होते. या ठिकाणी नातेवाईकांनी गर्दी केली होती. जामनेर येथील पोलिसांनी घटनास्थळाचा पंचनामा केला. याप्रकरणी जामनेर पोलीस स्टेशनला घटनेची नोंद करण्यात आली आहे.
