जळगाव महापालिकेच्या कार्याची माहिती देऊन दीपमाला काळे यांनी मांडल्या सूचना
जळगाव (प्रतिनिधी):-अखिल भारतीय स्थानिक स्वराज्य संस्था, महाराष्ट्र यांच्या वतीने राज्यातील महापौर आणि स्थानिक स्वराज्य संस्थांच्या महत्त्वाच्या प्रतिनिधींसाठी पुणे येथे नुकतेच एक दिवसीय विशेष प्रशिक्षण शिबिर आयोजित करण्यात आले होते. या शिबिरात जळगावच्या महापौर दीपमाला काळे यांनी सक्रिय सहभाग नोंदवत जळगाव शहरात राबवल्या जाणाऱ्या पर्यावरणपूरक उपक्रमांची माहिती दिली. यावेळी त्यांना स्मृतीचिन्ह देऊन सहभागाबद्दल सन्मानित करण्यात आले.
शिबिरातील दुसऱ्या सत्रात ‘विकसित महाराष्ट्र २०४७ साठी हवामान कृतीचे स्थानिकीकरण’ या विषयावर परिसंवाद आयोजित करण्यात आला होता. या चर्चेत राज्यातील विविध वक्त्यांसह जळगावच्या महापौर दीपमाला काळे यांना मत मांडण्याची संधी मिळाली. आपले मत मांडताना महापौर दीपमाला काळे म्हणाल्या की, वाढते तापमान ही आजची गंभीर समस्या असून त्यावर स्थानिक पातळीवर उपाययोजना करणे काळाची गरज आहे. जळगाव महानगरपालिकेमार्फत शहरात लवकरच ‘इको बस’ सेवा सुरू करण्यात येणार आहे. तसेच शहरासाठी विशेष ‘हिट अॅक्शन प्लॅन’ तयार करण्यात येत असल्याची माहिती त्यांनी दिली.
महापौरांनी जळगाव पालिकेच्या विविध प्रकल्पांचा उल्लेख करताना सांगितले की,
थंडाव्यासाठी उपाय: घरांच्या छतावर सोलर रिफ्लेक्टीव्ह पेंट कलरिंग करून घरातील तापमान कमी ठेवण्याचा प्रयत्न केला जात आहे.
मियावाकी व ऑक्सिजन पार्क: शहराच्या खुल्या जागांमध्ये ‘मियावाकी’ पद्धतीने वने विकसित केली जात असून ऑक्सिजन पार्क आणि ग्रीन कव्हर वाढवण्यावर भर दिला जात आहे.
जनसहभाग : लोकसहभागातून, स्वच्छता दूतांच्या माध्यमातून पर्यावरण संरक्षणासाठी कृती आराखडा तयार असून भविष्यात मोठ्या प्रमाणावर वृक्षलागवड करण्याचे नियोजन आहे.
प्रशिक्षणातून मिळाली कामाची ऊर्जा
“या एक दिवसीय प्रशिक्षणातून भविष्यात शहरासाठी अधिक चांगल्या योजना आणि उपक्रम राबवण्यासाठी नवी ऊर्जा मिळाली आहे,” अशा भावना महापौर दीपमाला काळे यांनी यावेळी व्यक्त केल्या.”दृष्टिकोन जागतिक ठेवा, नियोजन राष्ट्रीय करा आणि अंमलबजावणी स्थानिक पातळीवर करा.”असे त्या म्हणाल्या. या प्रशिक्षण शिबिरासाठी महापौर दीपमाला काळे यांच्यासोबत नगरसेविका ॲड. शुचिता हाडा यांची देखील उपस्थिती होती.
