शासकीय गाडीसमोर ‘थार’ उभी करून ५ ब्रास वाळूचा डंपर पळवला!
नायब तहसीलदारांच्या पथकावर घातला राडा; दोन अज्ञात चालकांविरुद्ध गुन्हा
जळगाव, प्रतिनिधी जळगाव तालुक्यातील शिरसोली परिसरात अवैध वाळू उपसा आणि वाहतूक करणाऱ्या वाळू माफियांची मुजोरी अत्यंत टोकाला पोहोचली आहे. कारवाईसाठी गेलेल्या महसूल विभागाच्या पथकाच्या शासकीय वाहनासमोर थेट ‘थार’ गाडी आडवी लावून, अवैध वाळूने भरलेला डंपर पळवून लावल्याची धक्कादायक घटना घडली आहे. याप्रकरणी एमआयडीसी पोलीस ठाण्यात दोन अज्ञात वाहनचालकांविरुद्ध शासकीय कामात अडथळा आणल्याप्रकरणी गुन्हा दाखल करण्यात आला आहे.
शिरसोलीच्या इंदिरानगरात हायव्होल्टेज ड्रामा!
मिळालेल्या माहितीनुसार, जळगावचे नायब तहसीलदार राहुल नगराज वाघ (वय ३९, रा. अल्पबचत भवन परिसर, जळगाव) हे आपल्या पथकासह २७ जून रोजी रात्री साडेदहा वाजेच्या सुमारास शिरसोली प्र. न. येथील इंदिरानगर वस्तीजवळ अवैध वाळू वाहतुकीविरोधात पेट्रोलींग करत होते. याच वेळी पथकाला विना क्रमांकाचा टाटा कंपनीचा एक संशयास्पद डंपर अवैधरित्या वाळूची वाहतूक करताना आढळून आला.
महसूल पथकाची कोंडी, ‘थार’मधून आले पाठीराखे
महसूल पथकाने तत्परता दाखवत या वाळूच्या डंपरवर कारवाई करण्याचा प्रयत्न केला. मात्र, तेवढ्यात वाळू माफियांच्या समर्थनाची काळ्या रंगाची ‘थार’ गाडी (क्र. MH-19 EG-9171) फिल्मी स्टाईलने घटनास्थळी आली. थार चालकाने शासकीय कामात जाणीवपूर्वक अडथळा आणण्याच्या हेतूने आपले वाहन थेट महसूल विभागाच्या गाडीसमोर आडवे लावले. महसूलचे वाहन अडकल्याची संधी साधत थार चालकाने डंपर चालकाला तिथून पळून जाण्यास मदत केली.
घटनास्थळी डंपरची प्राथमिक तपासणी केली असता, त्यात सुमारे ५ ब्रास अवैध वाळू भरलेली होती. या वाळूची बाजारातील किंमत अंदाजे २१ हजार रुपये असल्याचे महसूल विभागाने आपल्या तक्रारीत नमूद केले आहे. याप्रकरणी नायब तहसीलदार राहुल वाघ यांच्या फिर्यादीवरून विना क्रमांकाच्या डंपरचा चालक आणि थार गाडीचा चालक अशा दोघांविरुद्ध एमआयडीसी पोलीस ठाण्यात गुन्हा रजिस्टर क्रमांक ५७८/२०२६ नुसार, *भारतीय न्याय संहिता २०२३ च्या कलम ३०३(२) आणि २२२ अन्वये* गुन्हा दाखल करण्यात आला आहे. या घटनेमुळे महसूल वर्तुळात तीव्र संताप व्यक्त होत असून, पुढील तपास पोलीस हेड कॉन्स्टेबल चेतन पाटील करत आहेत.
