दोघांच्या भांडणात सहा वर्षीय वंश बारेला याचा नाहक गेला जीव ; आरोपीला तात्काळ अटक
जळगाव ( प्रतिनिधी ) – जळगाव तालुक्यातील आव्हाने शिवारात अत्यंत दुर्दैवी घटना घडली असून अवघ्या ९०० रुपयांच्या वादातून झालेल्या भांडणात निष्पाप सहा वर्षीय चिमुकल्याचा मृत्यू झाला आहे. या घटनेने संपूर्ण परिसर हादरला असून सर्वत्र हळहळ व्यक्त होत आहे.
मृत मुलाचे नाव वंश सुनील बारेला (वय ६, रा. उनपदेव, अडावद, ता. चोपडा) असे आहे. तर या प्रकरणी मच्छिंद्र रमण पाटील (वय ३२, रा. आव्हाने) याला जळगाव तालुका पोलिसांनी तात्काळ अटक केली असून त्याच्याकडील लाकडी दांडकाही जप्त करण्यात आला आहे.
पोलिसांनी दिलेल्या माहितीनुसार, आव्हाने शिवारातील म्हशींच्या गोठ्याचे व शेताचे रक्षण करण्यासाठी बारेला कुटुंब गेल्या दीड वर्षांपासून तेथे वास्तव्यास आहे. या गोठ्यात काम करणारा भावेश धनगर याच्याकडे आरोपी मच्छिंद्र पाटील याचे ९०० रुपये येणे होते.
शुक्रवारी या पैशांच्या कारणावरून दोघांमध्ये शाब्दिक वाद झाला. वादाचे रूपांतर हाणामारीत झाल्यानंतर आरोपीने जवळील लाकडी दांडक्याने भावेश धनगर याच्यावर वार केला. मात्र, भावेशने तो वार चुकवला. याचवेळी जवळच उभा राहून भांडण पाहत असलेला वंश बारेला याच्या अंगावर दांडका लागला.
या फटक्यात वंश गंभीर जखमी झाला. त्याला तातडीने उपचारासाठी नेण्यात आले, मात्र डॉक्टरांनी त्याला मृत घोषित केले.
घटनेची माहिती मिळताच जळगाव तालुका पोलिसांनी घटनास्थळी धाव घेत आरोपी मच्छिंद्र रमण पाटील याला ताब्यात घेत अटक केली. या घटनेमुळे आव्हाने परिसरात शोककळा पसरली असून एका क्षुल्लक वादातून निष्पाप चिमुकल्याचा जीव गेल्याने सर्वत्र हळहळ व्यक्त होत आहे. पोलिसांकडून पुढील तपास सुरू आहे.
