रावेर तालुक्यातील धामोडी फाट्यावरील घटना
रावेर (प्रतिनिधी) : रिक्षा उलटून झालेल्या अपघातात रिक्षा चालकाच्या डोक्याला गंभीर दुखापत होवून त्याचा मृत्यू झाल्याची ही घटना दि. ३ रोजी धामोडी फाट्याजवळ घडली. याप्रकरणी पोलिसात अकस्मात मृत्यूची नोंद करण्यात आली आहे.
सुभाष प्रल्हाद पाटील (वय ४३, रा. धामोडी ता. रावेर) असे मयत चालकाचे नाव आहे. त्यांच्या पश्चात पत्नी, मुलगा व भाऊ असा परिवार आहे. रिक्षाचालक सुभाष पाटील हे खिर्डीकडून धामोडीकडे येत असताना धामोडी फाट्याच्या पुढे त्यांची रिक्षा उलटली. या अपघातात रिक्षाचालक हे बाहेर रस्त्यावर फेकले जाऊन त्यांच्या डोक्याला गंभीर मार लागला.
त्यांना ग्रामस्थांनी तातडीने रावेर येथील ग्रामीण रुग्णालयात दाखल करण्यात आले. तपासणीनंतर वैद्यकीय अधिकाऱ्यांनी त्यांना मृत घोषित केले. शवविच्छेदन येथील ग्रामीण रुग्णालयात करण्यात आले. याप्रकरणी निंभोरा पोलिसात अकस्मात मृत्यूची नोंद करण्यात आली आहे. रिक्षा चालकाच्या मृत्यूमुळे धामोडी परिसरामध्ये हळहळ व्यक्त करण्यात येत आहे.
