रावेर पोलीस स्टेशनची कारवाई
जळगाव (प्रतिनिधी) : रावेर पोलीस स्टेशन येथे दाखल दुचाकी चोरीच्या गुन्ह्यामध्ये पोलिसांनी शहरातील छोरीया मार्केट परिसरातून एका १९ वर्षीय संशयित आरोपीला शिताफिने अटक केली आहे. त्याच्याकडून गुन्ह्यातील आणि इतर दोन अशा दुचाकी जप्त करण्यात आले आहेत.
रावेर पोलीस स्टेशन येथे यश प्रकाश देशमुख (वय २१, रा. शिरूर दिगर ता. शहादा हल्ली मु. विद्यानगर, रावेर) यांनी दुचाकी चोरीची फिर्याद दाखल केली होती. त्यांची दुचाकी दि. २ जुलै रोजी रात्री ८ वाजेच्या सुमारास चोरीस गेली होती. या गुन्ह्याचा तपास सुरू होता. दरम्यान रावेर पोलीस स्टेशनला गोपनीय माहिती मिळाली. त्यानुसार त्यांनी रावेर शहरातील छोरीया मार्केट येथे बुधवारी दि. ३ जुलै रोजी सापळा रचला.
त्या ठिकाणी एक १८ ते १९ वर्षाचा मुलगा दुचाकी चोरीसाठी आला आहे व तो सराईत चोर आहे, अशी माहिती मिळाली. मार्केटमध्ये माहिती घेतली असता त्या ठिकाणी संशयित आरोपी जगराम यारसिंह बारेला (वय १९, रा. शहापूर ता. जि. बऱ्हाणपूर, मध्यप्रदेश) हा मिळून आला. सुरुवातीला त्याने उडवाउडवीची उत्तर दिली. मात्र त्याला पोलिसी खाक्या दाखवताच त्याने दुचाकी चोरी केल्याचे कबूल केले.
गुन्ह्यात चोरीस झालेली दुचाकी आणि इतर आणखी दोन दुचाकी त्याने काढून दिल्या असून गुन्ह्याची कबुली दिली आहे. सदर कामगिरी पोलीस अधीक्षक डॉ. महेश्वर रेड्डी, अप्पर पोलीस अधीक्षक अशोक नखाते, सहाय्यक पोलीस अधीक्षक अन्नपूर्णा सिंह यांच्या मार्गदर्शनाखाली निरीक्षक विशाल जयस्वाल, नाईक किशोर सपकाळे, समाधान ठाकूर, सचिन घुगे, विशाल पाटील, प्रमोद पाटील, महेश मोगरे आदींच्या पथकाने केली आहे.
