जळगावात १२ ते १६ ऑगस्टदरम्यान पर्यावरण महोत्सव
हिरवांकुर संस्था व ग्रीन सिटी फाउंडेशनचा संयुक्त उपक्रम; पर्यावरणपूरक उपक्रम व प्रदर्शनाचे आयोजन
जळगाव : जळगाव शहर महानगरपालिका, नाशिक येथील ‘हिरवांकुर संस्था’ आणि जळगावच्या ‘ग्रीन सिटी फाउंडेशन’ यांच्या संयुक्त विद्यमाने शहरात १२ ते १६ ऑगस्टदरम्यान विविध पर्यावरणपूरक उपक्रम आणि प्रदर्शनाचे आयोजन करण्यात आले आहे. या पर्यावरण महोत्सवाचे उद्घाटन बुधवारी (१२ ऑगस्ट) सकाळी उत्साहात झाले.
उद्घाटन सोहळ्यास प्रमुख पाहुणे म्हणून जनार्दन स्वामीजी महाराज, माजी महापौर सीमामामी भोळे, भाजपा गटनेते प्रकाश बालाणी, शिवसेनेचे जिल्हाप्रमुख तथा गटनेते विष्णू भंगाळे, ज्येष्ठ नगरसेविका उज्ज्वला बेंडाळे, नगरसेविका ॲड. शुचिता हाडा, अमृता सोनवणे, हर्षल मावळे, पशुविज्ञान केंद्राचे वैभव सूर्यवंशी, रायसोनी महाविद्यालयाचे संजय शेखावत, कॅप्टन राजेंद्र राठोड, प्राचार्य डॉ. एल.पी. देशमुख, मुख्याध्यापिका सरोज तिवारी, निलयबाबू जैन, विजयकुमार वाणी आदी उपस्थित होते.
महोत्सवाच्या माध्यमातून नागरिकांमध्ये पर्यावरण संवर्धन, स्वच्छता, हरित शहर आणि पर्यावरणपूरक जीवनशैलीबाबत जनजागृती करण्याचा प्रयत्न करण्यात येत आहे. विविध पर्यावरणपूरक उपक्रमांसह प्रदर्शनाच्या माध्यमातून पर्यावरण रक्षणाचा संदेश नागरिकांपर्यंत पोहोचविण्यात येणार आहे.
महापौर दीपमाला काळे म्हणाल्या, “हा महोत्सव केवळ एक प्रदर्शन नसून पर्यावरण संवर्धनाची एक मोठी चळवळ आहे. जळगाव शहर स्वच्छ आणि हरित राहावे यासाठी आमचे सातत्याने प्रयत्न सुरू आहेत. या मोहिमेत सर्व जळगावकरांनी उत्स्फूर्तपणे सहभाग नोंदवावा.”
