गुटखा विक्रीप्रकरणी एकाविरुद्ध गुन्हा
पारोळा प्रतिनिधी):- पारोळा पोलीस ठाणे हद्दीत प्रतिबंधित गुटखा व पानमसाल्याची विक्री आणि साठा केल्याप्रकरणी एका व्यक्तीविरुद्ध गुन्हा दाखल करण्यात आला असून, पोलिसांनी कारवाई करत तब्बल २ लाख ५६ हजार १४१ रुपयांचा मुद्देमाल जप्त केला आहे.
मिळालेल्या माहितीनुसार, १० जून रोजी दुपारी साडेतीन वाजेच्या सुमारास तलाठी कॉलनी येथील प्लॉट क्रमांक ४, घर क्रमांक २९०/२ येथे ही कारवाई करण्यात आली. या ठिकाणी प्रतिबंधित सुगंधित पानमसाला व गुटख्याचा साठा करून विक्रीसाठी ठेवण्यात आल्याची माहिती पोलिसांना मिळाली होती.
कारवाईदरम्यान विमल पानमसाला, राजनिवास, व्ही-१ टोबॅको, कर्मचंद तसेच केसी गुटखा आदी विविध प्रकारचा प्रतिबंधित माल जप्त करण्यात आला. जप्त मुद्देमालाची एकूण किंमत २ लाख ५६ हजार १४१ रुपये असल्याचे पोलिसांनी सांगितले.
याप्रकरणी केलास गणेश चौधरी (वय ३८, रा. तलाठी कॉलनी, पारोळा) याच्याविरुद्ध गुन्हा दाखल करण्यात आला आहे. आरोपीने महाराष्ट्रात प्रतिबंधित असलेल्या गुटखा व सुगंधित पानमसाल्याचा साठा करून विक्रीसाठी ठेवला असल्याचे प्राथमिक तपासात निष्पन्न झाले आहे.
या प्रकरणी भारतीय न्याय संहिता (बीएनएस) कलम १२३, २२३, २७४, २७५ तसेच अन्न सुरक्षा व मानके कायदा २००६ अंतर्गत संबंधित कलमान्वये गुन्हा नोंद करण्यात आला असून पुढील तपास पोलीस उपनिरीक्षक योगेश महाजन करीत आहेत.
