वैचारिक प्रगल्भता वाढण्यासाठी देवगाव ग्रामपंचायतीचे राज्यभरातून कौतुक
जळगाव (प्रतिनिधी) : पारंपरिक दांडिया नृत्याला फाटा देऊन वैचारिक प्रगल्भता वाढावी याकरिता राज्यातील नामवंत व्याख्यातांना बोलावून शारदीय व्याख्यानमालेचे आयोजन पारोळा तालुक्यातील देवगाव येथे केले जाते. विविध विषयांवरील व्याख्याते त्यांचे विचार प्रगल्भ बुद्धीने मांडतात. हे विचार ग्रामस्थ आत्मसात करतात. त्यानुसार आचरण करण्याचा प्रयत्न ग्रामस्थ करीत असतात. पूर्ण महाराष्ट्रात हे एक आदर्श उदाहरण आहे.
देवगाव ग्रामपंचायत ही पंचक्रोशीतील नागरिकांना एक आदर्श निर्माण करावा असा एक अभिनव उपक्रम गेल्या तीन वर्षापासून सातत्याने राबवित आहे. देवगाव ग्रामपंचायत परिसरातील स्वच्छता झालेली विकास कामे ही विविध जिल्ह्यातून येणारे व्याख्याते ज्यावेळी अनुभवतात पाहतात त्यावेळी आपल्या व्याख्यानात त्याचा आवर्जून उल्लेख करायला विसरत नाही. या गावात परंपरेनुसार लाभलेली श्रद्धा आज देखील तितक्याच आपुलकीने जपली जाते. इतिहासातील अनेक महत्त्वाच्या विषयांना या गावानं अद्याप देखील जपलेल आहे. त्यात अहिल्यादेवी होळकर यांचे श्रद्धेचे स्थान असलेलं मंदिर आज देखील या गावात पाहायला मिळतं.
नव्या पिढीने नव्या संकल्पनेतून शिवशंकर भोलेनाथाचे उभारलेलं नदीकाठी वरचे मंदिर देखील या संपूर्ण पंचक्रोशीतील आकर्षणाचा आणि भक्ती भावाचा विषय ठरत आहे. एकाच पारावर असलेलं हिंदू देवतेचं मंदिर आणि सोबतच मुस्लिम धर्मीयांची असलेली प्रार्थना स्थळ हे या गावाचं हिंदू-मुस्लिमतेच ऐक्य दाखवणार एकमेव स्थान आहे. गावात दुर्गोत्सवानिमित्त राबविल्या जाणाऱ्या या शारदीय व्याख्यानमालेत नामवंत व्याख्यातांचा प्रत्येक वर्षी सहभाग करून घेतला जातो.
ज्यात संपूर्ण देशभरात गाजलेले हरिभक्त पारायण इंदुरीकर महाराज, पोपटराव पेरे पाटील यासह नामवंत व्याख्यात्यांचा देखील सहभाग घेतला जातो. स्व. वसंतराव पाटील अर्थात वसंत जिभाऊ यांच्या विचारांची प्रेरणा घेऊन त्यांचे चिरंजीव सरपंच समीर पाटील कार्य करीत आहे. तसेच त्यांना वेळोवेळी एरंडोल-पारोळा मतदारसंघाचे आ. चिमणराव पाटील व अमोल पाटील यांचेही मार्गदर्शन लाभत आहे.
