केंद्रीय मंत्री रक्षा खडसे यांच्यावरील कथित वक्तव्याविरोधात नंदुरबारमध्ये गुर्जर समाजाचा संतापमोर्चा
जळगाव/नंदुरबार: भाजपचे प्रदेश महामंत्री विजय चौधरी यांच्यातील एका कथित ऑडिओ क्लिपवरून संपूर्ण महाराष्ट्रात राजकीय आणि सामाजिक वर्तुळात तीव्र संतापाची लाट पसरली आहे. या व्हायरल ऑडिओ क्लिपमध्ये केंद्रीय क्रीडा व युवक कल्याण राज्यमंत्री रक्षा खडसे तसेच माजी खासदार डॉ. हिना गावित यांच्यासह इतर महिला लोकप्रतिनिधींविषयी अत्यंत आक्षेपार्ह आणि खालच्या पातळीवरील भाषा वापरल्याचा आरोप होत आहे. या घटनेच्या निषेधार्थ नंदुरबार जिल्ह्यात भव्य मोर्चा काढून प्रशासनाला निवेदन देण्यात आले.
नंदुरबार जिल्हा लेवा पाटीदार गुजर समाजाच्या वतीने या निषेध मोर्चाचे आयोजन करण्यात आले होते. भर पावसात काढण्यात आलेल्या या मोर्चात महाराष्ट्र, गुजरात आणि मध्य प्रदेश या तिन्ही राज्यांतील समाजबांधव आणि विशेषतः महिला वर्ग मोठ्या संख्येने सहभागी झाला होता. महिला लोकप्रतिनिधींविषयी अपशब्द वापरणाऱ्या विजय चौधरी यांना तातडीने अटक करण्यात यावी आणि त्यांना मदत करणाऱ्यांवर कडक कायदेशीर कारवाई व्हावी, ही या मोर्चातील प्रमुख मागणी होती.
दरम्यान, केंद्रीय मंत्री रक्षा खडसे या नंदुरबार जिल्ह्याच्या माहेरवाशीण असून जळगाव जिल्हा हे त्यांचे सासर आणि मुख्य कर्मभूमी आहे. अत्यंत संवेदनशील, मनमिळाऊ स्वभाव आणि राजकारण बाजूला ठेवून कामावर निष्ठा ठेवणारे लोकप्रतिनिधी म्हणून त्यांची ओळख आहे. सर्वसामान्य नागरिक आणि महिला वर्गात त्या विशेष लोकप्रिय आहेत. अशा कर्तबगार लोकप्रतिनिधीबाबत आक्षेपार्य भाषा वापरल्याने महिला वर्गात प्रचंड रोष निर्माण झाला आहे.
नंदुरबार जिल्ह्यात ज्या आत्मियतेने आणि आक्रमकतेने महिलांच्या सन्मानासाठी सर्व समाज एकत्र आला, त्याच धर्तीवर आता रक्षा खडसे यांची कर्मभूमी असलेल्या जळगाव जिल्ह्यातही तसे आंदोलन उभे राहणार का, तसेच जळगावातील समाजबांधव आणि महिला वर्ग याविरोधात कधी एकत्र येणार, याकडे संपूर्ण राज्याचे लक्ष लागून राहिले आहे.
