मुक्ताईनगरा पोलीसात गुन्हा दाखल
मुक्ताईनगर (प्रतिनिधी) :- कॉल रेकॉर्डिंग व्हायरल करण्याची धमकी देत तसेच पतीला जीवे मारण्याची धमकी देऊन एका विवाहित महिलेवर लैंगिक अत्याचार केल्याचा धक्कादायक प्रकार मुक्ताईनगर तालुक्यात उघडकीस आला आहे. या प्रकरणी मुक्ताईनगर पोलीस ठाण्यात आरोपीविरुद्ध बलात्कारासह विविध गंभीर कलमांन्वये गुन्हा दाखल करण्यात आला असून पुढील तपास सुरू आहे.
पोलिसांनी दिलेल्या माहितीनुसार, पीडित महिलेने दिलेल्या फिर्यादीनुसार संशयित आरोपी ईश्वर प्रकाश लवांडे (रा. निमखेडी खुर्द, ता. मुक्ताईनगर) याने एका महिन्यापासून पीडितेला त्रास दिला. त्याच्याकडे दोघांमधील संभाषणाचे कॉल रेकॉर्डिंग असल्याचे सांगत, “तू मला भेटण्यासाठी बाहेर ये, अन्यथा हे कॉल रेकॉर्डिंग तुझ्या पतीला पाठवीन,” अशी धमकी आरोपीने दिली. तसेच “तुझ्या पतीला जीवे मारीन,” अशी धमकी देत तिच्यावर जबरदस्तीने लैंगिक अत्याचार केल्याचा आरोप फिर्यादीने केला आहे.
या प्रकरणी मुक्ताईनगर पोलीस ठाण्यात भारतीय न्याय संहिता (BNS) कलम ६४(१) व ३५१(२) अन्वये गुन्हा दाखल करण्यात आला आहे. आरोपीविरुद्ध अद्याप अटक करण्यात आलेली नसून पोलिसांकडून पुढील तपास सुरू आहे.
या प्रकरणाचा तपास पोलीस उपनिरीक्षक निलेश गोसावी करीत असून वरिष्ठ पोलीस निरीक्षकांच्या मार्गदर्शनाखाली अधिक तपास सुरू आहे.
