मुंबई (वृत्तसंस्था ) — माजी मंत्री एकनाथराव खडसे यांनी भोसरी जमीन गैरव्यवहारात हात नसल्याचा दावा केला असला तरी तेच सूत्रधार असल्याचा दावा ईडीने आरोपत्रातून केला आहे.
या आरोपपत्रात मंदाताई खडसे आणि गिरीश चौधरी यांनी शेल कंपन्यांतून फायनान्स मिळवला असतांनाच एकनाथ खडसे यांनी पत्नीच्या नावे ५० लाख ट्रान्सफर करून ३८ लाख रूपये भूखंड खरेदीसाठी वापरल्याचा संदर्भ घेण्यात आलेला आहे.
एकनाथराव खडसे यांच्यासह मंदाताई खडसे आणि जावई गिरीश चौधरी यांच्याविरोधात अलीकडेच आरोपपत्र दाखल केले आहे. गिरीश चौधरी अटकेत असून एकनाथराव खडसे यांची ईडीने दोनदा चौकशी केली आहे. मंदाताई खडसे यांना ईडीने समन्स बजावले असून त्यांनी उपस्थित राहण्यासाठी वेळ मागून घेतली आहे.
एका इंग्रजी दैनिकाने प्रसिद्ध केलेल्या वृत्तानुसार एकनाथराव खडसे यांनी ईडीसमोरच्या चौकशीत आपल्याला या व्यवहारात काहीच माहिती नसल्याचे सांगितले असले तरी आरोपपत्रात त्यांचीच महत्वाची भूमिका असल्याचे स्पष्ट म्हटले आहे.
आरोपपत्रात म्हटले आहे की, एकनाथराव खडसे यांनी पत्नीला ५० लाख रूपये त्यांच्या बँक अकाऊंटमध्ये ट्रान्सफर केले. यातील ३८ लाख रूपये त्यांनी भोसरी येथील वादग्रस्त भूखंड खरेदी करण्यासाठी उपयोगात आणले. हा भूखंड ३ कोटी ७५ लाख रूपयांना खरेदी करण्यात आला असून यावर १ कोटी ७८ लाख रूपयांचे मुद्रांक शुल्क अदा करण्यात आले आहे. अशा प्रकारे हा पूर्ण सौदा ५ कोटी ५३ लाख रूपयांचा असल्याचे आरोपपत्रात म्हटले आहे. यातील २ कोटी ३८ लाख रूपये हे मंदाताई खडसे यांनी तर ३ कोटी १५ लाख रूपये हे गिरीश चौधरी यांनी भरलेत. मंदाताई खडसे यांना बेंचमार्क बिल्डकॉन प्रायव्हेट लिमिटेड या कंपनीने दोन कोटी रूपयांचे कर्ज दिले. ही कंपनी शेल कंपनी प्रकारातील असून त्यांनी अनसिक्युअर्ड लोन प्रकारातील कर्ज सौ. मंदाताई खडसे यांना दिलेत. एकनाथ खडसे यांनी दिलेल्या ५० लाख रूपयांमधून त्यांनी ३८ लाख रूपयांचा वापर या जमीन खरेदीसाठी केला.
गिरीश चौधरी यांना देखील बेंचमार्क बिल्डकॉन प्रायव्हेट लिमिटेड या कंपनीने चार कोटी रूपयांचे लोन दिले. यासाठी चौधरी यांनी बॅक – डेटेड प्रकारातील डॉक्युमेंट संबंधीत कंपनीला दिल्याचे ईडीने आरोपपत्रात म्हटले आहे. यातीलच ३ कोटी १५ लाख रूपयांचा वापर त्यांनी भोसरी येथील भूखंडाच्या खरेदीसाठी केला. यासाठी ज्या कंपनीकडून पैसे कर्ज घेतले. ती बेचमार्क बिल्डकॉन प्रायव्हेट लिमिटेड ही शेल कंपनी असल्याचे ईडीने आरोपपत्रामध्ये म्हटले आहे.
ईडी समोरच्या चौकशीत एकनाथराव खडसे यांनी या व्यवहाराशी काहीही संबंध नसल्याचा दावा केला आहे. आपण पत्नीच्या अकाऊंटमध्ये ५० लाख रूपयांची केलेली ट्रान्सफर ही नियमित असून पतीने पत्नीच्या अकाऊंटमध्ये पैसे शेअर करण्याइतपत नॉर्मल असल्याचा दावा त्यांनी चौकशीत केला होता. तथापि, एकनाथराव खडसे यांचा यात पूर्ण सहभाग होता. त्यांनी हेतूपुर्वक पत्नी व जावयाला ही जमीन खरेदी करण्यासाठी मदत केली. यासाठी पैसे सुध्दा दिलेत. यातूनच तेव्हा २२ कोटी ६३ लाख खरे मूल्य असणारी जमीन ही ३ कोटी ७५ लाख रूपयांना विकत घेण्यात आली. नवीन भूसंपादन कायद्याच्या दरानुसार मोबदला मिळावा हा हेतू असून यासाठी एकनाथराव खडसे यांनी थेट मदत केली असून तेच याचे सूत्रधार असल्याचा दावा ईडीने आरोपपत्रामध्ये केला आहे. तत्कालीन स्थानिक उपनिबंधक रवींद्र मुळे यांच्यावर देखील आरोपपत्र दाखल करण्यात आले आहे. त्यांनी रेडी रेकनर दर कमी करून हा भूखंड खरेदी करून देण्यात महत्वाची भूमिका बजावल्याचे ईडीचे म्हणणे आहे.
