उत्तर प्रदेशातील टोळी जेरबंद
जळगाव (प्रतिनिधी) – जळगाव शहरातील पोलन पेठ भागातील ‘इक्वीटस स्मॉल बँक’चे एटीएम मशीन चोरणाऱ्या आंतरराज्यीय टोळीचा स्थानिक गुन्हे शाखेने पर्दाफाश केला आहे. या कारवाईत उत्तर प्रदेशातील दोन अट्टल गुन्हेगारांना अटक करण्यात आली असून त्यांच्याकडून गुन्ह्यात वापरलेली मोटारसायकल आणि इतर मुद्देमाल जप्त करण्यात आला आहे.
जळगाव शहरातील पोलन पेठ येथील सत्यम प्लाझा कॉम्प्लेक्समधील इक्वीटस स्मॉल बँकेचे एटीएम मशीन ३ एप्रिल २०२६ रोजी अज्ञात चार चोरट्यांनी पळवून नेले होते. याप्रकरणी बँक मॅनेजर हरीष विजय गांधी यांच्या फिर्यादीवरून जळगाव शहर पोलीस ठाण्यात गुन्हा दाखल करण्यात आला होता.
पोलीस अधीक्षक महेश्वर रेड्डी यांनी या गुन्ह्याचा समांतर तपास करण्याचे आदेश स्थानिक गुन्हे शाखेला दिले होते. तपासादरम्यान, वरिष्ठ पोलीस निरीक्षक राहुल गायकवाड यांना गुप्त बातमीदारामार्फत माहिती मिळाली की, एटीएम चोरी करणारे संशयित पुन्हा चोरीच्या उद्देशाने जळगाव शहरात आले आहेत. या माहितीच्या आधारे एलसीबीच्या पथकाने १४ एप्रिल २०२६ रोजी मन्यारखेडा रोडवरून दोन संशयितांना ताब्यात घेतले. मोबीन आत्मज मिला (वय २८, रा. बेगी नाजर, उत्तर प्रदेश), अब्दुल करीम नुर हसन (वय ५२, रा. तितरोद, उत्तर प्रदेश) यांना गजाआड करण्यात आले आहे. पकडलेल्या आरोपींनी त्यांच्या इतर तीन साथीदारांच्या (फरहान, अकबर आणि मुजाहीद) मदतीने हा गुन्हा केल्याची कबुली दिली आहे.
एटीएम चोरी करण्यासाठी त्यांनी शनिपेठ पोलीस ठाण्याच्या हद्दीतून एक महिंदरा पिकअप गाडी चोरली होती.
या टोळीने महाराष्ट्र, झारखंड आणि भारतभर विविध ठिकाणी एटीएम चोरीचे गुन्हे केले आहेत. आरोपींकडून ५० हजार रुपये किमतीची स्प्लेंडर मोटारसायकल, मोबाईल, रोख रक्कम आणि दोन हेल्मेट असा एकूण ६१,२०० रुपयांचा मुद्देमाल जप्त करण्यात आला आहे.
या टोळीवर जळगाव (शहर आणि शनिपेठ), पुणे ग्रामीण (यवत पोलीस स्टेशन) आणि झारखंड राज्यात गंभीर गुन्हे दाखल आहेत. पुढील तपासासाठी आरोपींना जळगाव शहर पोलिसांच्या ताब्यात देण्यात आले असून, सहाय्यक पोलीस निरीक्षक सुरेश आव्हाड या प्रकरणाचा अधिक तपास करत आहेत. ही कारवाई पोलीस अधीक्षक महेश्वर रेड्डी, अपर पोलीस अधीक्षक संदीप गावीत, आणि उपविभागीय पोलीस अधिकारी नितीन गणापुरे यांच्या मार्गदर्शनाखाली स्थानिक गुन्हे शाखेच्या पथकाने यशस्वीरित्या पार पाडली.
