चोपडा शहर पोलिस ठाण्यात सावकारी कायद्यासह विविध कलमान्वये गुन्हा दाखल
चोपडा (प्रतिनिधी) – चोपडा शहराबाहेरील जुन्या माचला रोडवरील शेतातील वडाच्या झाडाला गळफास घेऊन ४९ वर्षीय व्यक्तीने आत्महत्या केल्याची घटना ३० सप्टेंबर रोजी रात्री घडली. या प्रकरणी सावकारीच्या व्याजाच्या तगाद्याला कंटाळून आत्महत्या केल्याचा आरोप असून, चोपडा शहर पोलिस ठाण्यात तिघांविरुद्ध भारतीय न्याय संहितेतील कलम १०८, ११९(१), ११५(२), ३५१(२), ३५२, ३(५) तसेच सावकारी अधिनियमातील कलम ३९ व ४५ अन्वये गुन्हा दाखल करण्यात आला आहे.
या प्रकरणातील मृत व्यक्तीचे नाव वाल्मिक जिजाबराव शिंदे (वय ४९, रा. वडळी, ता. चोपडा) असे आहे. ३० सप्टेंबर २०२६ रोजी रात्री सुमारे १० वाजता चोपडा शहराबाहेरील जुन्या माचला रोडवरील एका शेतात वडाच्या झाडाला गळफास घेतलेल्या अवस्थेत ते आढळून आले. याबाबत १ ऑक्टोबर रोजी दुपारी चोपडा शहर पोलिस ठाण्यात गुन्ह्याची नोंद करण्यात आली.
मृताचे पुत्र रोहित वाल्मिक शिंदे (वय २०, रा. वडळी, ता. चोपडा) यांनी दिलेल्या फिर्यादीनुसार, त्यांच्या वडिलांनी आरोपींकडून ८ हजार रुपये व्याजाने घेतले होते. आरोपींकडून दररोज १५० रुपये व्याजाची मागणी करण्यात येत होती. व्याजाचे पैसे देऊ न शकल्याने आरोपींनी फिर्यादीच्या वडिलांच्या दुकानाची चावी हिसकावून घेतली. तसेच दुकानाची चावी परत मिळणार नाही, अशी धमकी देऊन त्यांच्याशी मारहाण केल्याचा आरोप फिर्यादीने केला आहे.
या सततच्या सावकारी व्याजाच्या तगाद्यामुळे वाल्मिक शिंदे मानसिक त्रासाला कंटाळले. आत्महत्या करण्यापूर्वी त्यांनी आरोपींकडून त्रास दिला जात असल्याबाबत कथित सुसाईड नोट लिहून ठेवल्याचे फिर्यादीत नमूद करण्यात आले आहे. तसेच आरोपींनी शिवीगाळ व धमकी देऊन व्याजासाठी त्रास दिल्यामुळेच आपल्या वडिलांनी गळफास घेऊन आत्महत्या केल्याचा आरोप रोहित शिंदे यांनी फिर्यादीत केला आहे.
या प्रकरणी राहुल रामकृष्ण माळी (वय २८), विकास रामदास माळी (वय ३५), दोघे रा. महात्मा फुलेनगर, चोपडा आणि अनिल बारकू माळी (वय ३८, रा. तारामतीनगर, चोपडा) यांच्याविरुद्ध गुन्हा दाखल करण्यात आला आहे. चोपडा शहर पोलिसांनी तिघांना अटक केली असून, पुढील तपास सपोनि एकनाथ भिसे करीत आहेत.
