जामनेर( प्रतिनिधी ) – जामनेर शहरातील भुसावळ रोडवरील सुशीला गॅस एजन्सीच्या गोदामातून ३३ हजार रुपये किमतीचे १० घरगुती गॅस सिलिंडर अज्ञात चोरट्याने चोरून नेल्याची घटना समोर आली आहे. याप्रकरणी जामनेर पोलीस ठाण्यात अज्ञात चोरट्याविरुद्ध गुन्हा दाखल करण्यात आला आहे.
छोट्या हत्ती वाहनातून सिलिंडर ठेवले होते
पोलिसांनी दिलेल्या माहितीनुसार, फिर्यादी स्वप्नील सुधाकर कस्तुरे (वय ३८), रा. नगरखाना, जामनेर यांनी भारत गॅस कंपनीचे लाल रंगाचे १० सीलबंद घरगुती गॅस सिलिंडर गोदामाबाहेर उभ्या असलेल्या छोटा हत्ती वाहन क्रमांक एमएच १९ सीएक्स २६७४ मध्ये ठेवले होते.
तारेचे कुंपण वाकवून चोरी
२० ऑगस्ट रोजी रात्री साडेनऊ ते २१ ऑगस्ट रोजी सकाळी साडेआठ या कालावधीत अज्ञात चोरट्याने एजन्सीच्या कंपाउंडवरील तारेचे कुंपण वाकवून वाहनात ठेवलेले १० गॅस सिलिंडर लंपास केल्याचे फिर्यादीत नमूद आहे. चोरीस गेलेल्या सिलिंडरची एकूण किंमत ३३ हजार रुपये असल्याचे पोलिसांनी सांगितले.
अज्ञात चोरट्याविरुद्ध गुन्हा
या प्रकरणी जामनेर पोलीस ठाण्यात गुन्हा क्रमांक ३९०/२०२६ नोंदविण्यात आला असून, भारतीय न्याय संहितेच्या कलम ३०३(२) अन्वये गुन्हा दाखल करण्यात आला आहे. घटनेचा तपास सफौ/६२६ सुनील जोशी करीत आहेत.
पोलिसांकडून परिसरातील सीसीटीव्ही फुटेज तसेच इतर तांत्रिक माहितीच्या आधारे चोरट्याचा शोध सुरू आहे.
