स्टिअरिंग रॉड जाम झाल्याने बस कठड्याला अडकली; चार प्रवासी किरकोळ जखमी
जळगाव |(प्रतिनिधी) : संभाजीनगरहून सुरतकडे जाणाऱ्या एसटी बसचा कन्नड घाटात भीषण अपघात होता होता टळला. बसचा स्टिअरिंग रॉड जाम झाल्याने चालकाचा ताबा सुटला आणि बस रस्त्याच्या कडेला असलेल्या कठड्याला जाऊन अडकली. या घटनेत बसमधील ५९ प्रवाशांचा जीव थोडक्यात बचावला. चार प्रवाशांना किरकोळ दुखापत झाली असून, त्यांना उपचारासाठी रुग्णालयात दाखल करण्यात आले आहे.
दरीत कोसळण्यापासून थोडक्यात बचाव
प्राथमिक माहितीनुसार, संभाजीनगरहून सुरतकडे एसटी बस प्रवाशांना घेऊन जात होती. कन्नड घाटातील वळणावर अचानक बसच्या स्टिअरिंग रॉडमध्ये बिघाड होऊन तो जाम झाला. त्यामुळे बसचा समतोल बिघडला आणि बस रस्त्याच्या कठड्यावर जाऊन अडकली.
बस कठड्याला अडकल्यामुळे ती दरीत कोसळण्यापासून बचावली. अन्यथा मोठी दुर्घटना घडण्याची शक्यता होती.
चार जणांना किरकोळ दुखापत
या घटनेत बसमधील चार प्रवाशांना किरकोळ दुखापत झाली. त्यांना तातडीने रुग्णालयात नेण्यात आले असून, त्यांच्यावर उपचार सुरू आहेत. बसमधील उर्वरित प्रवासी सुरक्षित असल्याचे सांगण्यात आले.घटनेनंतर काही काळ प्रवाशांमध्ये भीतीचे वातावरण होते. मात्र, मोठी जीवितहानी टळल्याने सर्वांनी सुटकेचा निःश्वास सोडला.
