व्हॉट्सॲपवरून संपर्क साधत १८० अदानी सोलर पॅनेल देण्याचे दिले आमिष; सायबर पोलिसांत अज्ञात व्यक्तींविरुद्ध गुन्हा
जळगाव (प्रतिनिधी) – सोलर पॅनेल मिळवून देण्याचे आमिष दाखवत एका २५ वर्षीय तरुणाची तब्बल ११ लाख ५० हजार रुपयांची ऑनलाइन आर्थिक फसवणूक झाल्याची घटना समोर आली आहे. याप्रकरणी जळगाव सायबर पोलिस ठाण्यात अज्ञात व्यक्तींविरुद्ध भारतीय न्याय संहितेच्या कलम ३१८(४), ३(५) तसेच माहिती तंत्रज्ञान कायद्यातील कलम ६६(ड) अन्वये गुन्हा दाखल करण्यात आला आहे.
याबाबत देवेंद्र भोळे (वय २५ जळगाव) यांनी सायबर पोलिसांत फिर्याद दिली आहे. पोलिसांनी दिलेल्या माहितीनुसार, २९ जून २०२६ पासून २७ सप्टेंबर २०२६ पर्यंत फिर्यादी यांच्या मोबाईल क्रमांकावर व्हॉट्सॲपच्या माध्यमातून काही व्यक्तींनी संपर्क साधला. त्यांनी स्वतःचा संबंध Sunroute Energy Solution Pvt. Ltd. या कंपनीशी असल्याचे सांगून स्नेहल कदम नावाच्या महिलेचा तसेच तिचे सहकारी कमलेश पाटील आणि अक्षत पांडे यांचा वापर करून फिर्यादीशी संपर्क साधला. या व्यक्तींनी फिर्यादीला १८० अदानी कंपनीचे सोलर पॅनेल मिळवून देण्याचे आश्वासन दिले. त्यासाठी विविध कारणे सांगून फिर्यादीचा विश्वास संपादन करण्यात आला. त्यानंतर फिर्यादीला एका बँक खात्यावर पैसे जमा करण्यास सांगण्यात आले.
फिर्यादी यांनी संबंधितांच्या सांगण्यावरून बँक खाते क्रमांकावर ऑनलाइन पद्धतीने पैसे पाठवले. त्यानंतर एकूण ११ लाख ५० हजार रुपये संबंधितांना ऑनलाइन स्वरूपात देण्यात आले. ना सोलर पॅनेल मिळाले, ना पैसे परत
पैसे भरल्यानंतरही फिर्यादीला आश्वासन दिल्याप्रमाणे सोलर पॅनेल मिळाले नाहीत. तसेच भरलेली रक्कमही परत करण्यात आली नाही. आपली आर्थिक फसवणूक झाल्याचे लक्षात आल्यानंतर फिर्यादीने सायबर पोलिस ठाण्यात धाव घेत तक्रार दाखल केली.
या प्रकरणी सायबर पोलिस ठाणे, जळगाव गुन्हा रजिस्टर क्रमांक ३५/२०२६, भाग-५ अन्वये गुन्हा दाखल करण्यात आला आहे.
या प्रकरणाचा पुढील तपास पोलीस निरीक्षक प्रदीप ठाकूर, सायबर पोलिस ठाणे, जळगाव करीत आहेत.
