चिचगव्हाण येथील सासरच्या मंडळींविरुद्ध मेहुणबारे पोलिसांत गुन्हा
पतीसह सासूवर शारीरिक व मानसिक छळाचा आरोप
चाळीसगाव (प्रतिनिधी) – माहेरून लग्नाचा खर्च म्हणून ७ लाख रुपये आणावेत, या मागणीवरून विवाहितेचा शारीरिक व मानसिक छळ करून तिला चापटाबुक्क्यांनी मारहाण तसेच शिवीगाळ करून जीवे ठार मारण्याची धमकी दिल्याची घटना चिचगव्हाण येथे समोर आली आहे.
याप्रकरणी मेहुणबारे पोलिस ठाण्यात पतीसह सासूविरुद्ध गुन्हा दाखल करण्यात आला आहे.
या प्रकरणी सौ. रितू बाळू जाधव (वय २०,चिचगव्हाण, ता. चाळीसगाव, जि. जळगाव) यांनी फिर्याद दिली आहे. त्यांच्या तक्रारीवरून मेहुणबारे पोलिस ठाणे गुन्हा रजिस्टर क्रमांक २७८/२०२६ अन्वये भारतीय न्याय संहितेच्या कलम ८५, ११५(२), ३५२, ३५१(३), ३(५) अन्वये गुन्हा दाखल करण्यात आला आहे.
फिर्यादीच्या तक्रारीनुसार, त्यांचे लग्न ३ ऑगस्ट २०२५ रोजी झाले होते. लग्नानंतर सुरुवातीचे एक-दोन महिने सासरच्या मंडळींनी चांगले वागविले. त्यानंतर माहेरून लग्नाचा खर्च म्हणून ७ लाख रुपये आणावेत, अशी मागणी करण्यात आली.
ही रक्कम आणण्यासाठी पती बाळू पापालाल जाधव आणि सासू लक्ष्मीबाई पापालाल जाधव, दोघे रा. चिचगव्हाण, ता. चाळीसगाव, यांनी फिर्यादीचा वेळोवेळी शारीरिक व मानसिक छळ केल्याचे तक्रारीत नमूद आहे.
माहेरून पैसे आणण्याच्या मागणीवरून आरोपींनी फिर्यादीला चापटाबुक्क्यांनी मारहाण करून शिवीगाळ केली. तसेच जीवे ठार मारण्याची धमकी दिल्याचा आरोप आहे. या त्रासाला कंटाळून अखेर फिर्यादीने पोलिसांत धाव घेत पती व सासूविरुद्ध तक्रार दाखल केली. या प्रकरणी पोलिसांनी पती बाळू पापालाल जाधव आणि सासू लक्ष्मीबाई पापालाल जाधव, दोघे रा. चिचगव्हाण, ता. चाळीसगाव, जि. जळगाव, यांच्याविरुद्ध गुन्हा दाखल केला आहे.
या प्रकरणाचा पुढील तपास पोहेकॉ मिलिंद कुमावत, मेहुणबारे पोलिस ठाणे करीत आहेत.
