दिनेश बडगुजर व मुजफ्फरअली सैय्यद यांना राष्ट्रपती पदक जाहीर; स्वातंत्र्यदिनी पालकमंत्र्यांच्या हस्ते सन्मान
जळगाव ( प्रतिनिधी ) – उत्तर महाराष्ट्रात कायदा-सुव्यवस्था राखण्यासोबतच गुन्हेगारीवर धाडसी कारवाया करणाऱ्या पोलिसांचा राज्य व राष्ट्रीय स्तरावर मोठा गौरव झाला आहे. जळगाव जिल्ह्याचे पोलीस अधीक्षक श्रीकांत धिवरे यांना महाराष्ट्र शासनाकडून ‘उत्कृष्ट सेवा पदक’ जाहीर झाले आहे. त्याचबरोबर पोलीस उपनिरीक्षक दिनेश बडगुजर आणि सहाय्यक पोलीस उपनिरीक्षक मुजफ्फरअली जफरअली सैय्यद यांना भारताच्या राष्ट्रपती द्रौपदी मुर्मू यांच्या वतीने गुणवत्तापूर्ण सेवेसाठी प्रतिष्ठित ‘राष्ट्रपती पदक’ जाहीर करण्यात आले आहे. उद्या, १५ ऑगस्ट रोजी होणाऱ्या स्वातंत्र्यदिनाच्या शासकीय ध्वजारोहण सोहळ्यात राज्याचे पालकमंत्री गुलाबराव पाटील यांच्या हस्ते या तिन्ही अधिकाऱ्यांना प्रदान करून सन्मानित करण्यात येणार आहे.
जळगाव पोलीस दलाच्या शिरपेचात मानाचे तीन तुरे
जिल्ह्यात कायदा व सुव्यवस्था अबाधित राखणे, गुन्हेगारीवर कडक नियंत्रण ठेवणे आणि पोलीस दलाच्या कार्यक्षमतेत वाढ करण्यासाठी केलेल्या उल्लेखनीय कामगिरीबद्दल एसपी श्रीकांत धिवरे यांना राज्य शासनाचा हा मानाचा पुरस्कार जाहीर झाला आहे. तर पीएसआय दिनेश बडगुजर व एएसआय मुजफ्फरअली सैय्यद यांच्या प्रदीर्घ, कर्तव्यनिष्ठ व शिस्तबद्ध सेवेची दखल घेत त्यांना राष्ट्रपती पदकाने सन्मानित करण्यात आले आहे. एकाच वेळी तीन वरिष्ठ अधिकाऱ्यांना सर्वोच्च सन्मान मिळाल्याने जळगाव जिल्हा पोलीस दलात उत्साहाचे वातावरण आहे.
