एमआयडीसीतील घटनेने खळबळ; मृत्यू संशयास्पद असल्याचा नातेवाईकांचा आरोप
जळगाव (प्रतिनिधी) : एमआयडीसी परिसरातील एका ठिबक निर्मिती कंपनीत काम करणाऱ्या तरुणाचा दुसऱ्या मजल्यावरून पडून दुर्दैवी मृत्यू झाल्याची घटना समोर आली आहे. दीपक छगन भिल (वय ३५, मूळ रा. खर्डी, ता. चोपडा, ह.मु. एमआयडीसी एस सेक्टर) असे मृत तरुणाचे नाव असून उपचार सुरू असताना त्याची प्राणज्योत मालवली. या घटनेनंतर नातेवाईकांनी मृत्यू संशयास्पद असल्याचा आरोप करत गुन्हा दाखल होईपर्यंत मृतदेह ताब्यात घेण्यास नकार दिला.
मिळालेल्या माहितीनुसार, लक्ष्मी अॅग्रो इंडस्ट्रीज या कंपनीत दीपक भिल कामाला होता. कंपनी परिसरातच तो पत्नी व तीन मुलांसह वास्तव्यास होता. शनिवारी रात्री सुमारे ११ वाजेच्या सुमारास कंपनीच्या दुसऱ्या मजल्यावरून खाली पडल्याने तो गंभीर जखमी झाला. सहकाऱ्यांनी त्याला तात्काळ जिल्हा शासकीय वैद्यकीय महाविद्यालय व रुग्णालयात दाखल केले. मात्र उपचार सुरू असताना त्याचा मृत्यू झाला.
घटनेची माहिती मिळताच रविवारी सकाळी दीपकच्या नातेवाईकांनी जळगाव गाठले. त्यानंतर रुग्णालय परिसरात मोठी गर्दी झाली होती. पोलिसांनी आमच्या माहितीशिवाय आणि परवानगी न घेता शवविच्छेदन केल्याचा गंभीर आरोप कुटुंबीयांनी केला. पंचनामा आणि शवविच्छेदन प्रक्रियेबाबत कोणतीही माहिती देण्यात आली नसल्याचा दावा नातेवाईकांनी केला आहे.
