क्रूझ जहाजावर संसर्गाचे रुग्ण आढळल्याने आरोग्य यंत्रणा सतर्क
मुंबई/वृत्तसंस्था :- जगभरात पुन्हा एका नव्या विषाणूची चर्चा सुरू झाली असून हंटा व्हायरसच्या वाढत्या प्रकरणांमुळे अनेक देशांमध्ये चिंता व्यक्त केली जात आहे. दक्षिण अटलांटिक महासागरात प्रवास करणाऱ्या ‘एमव्ही होंडियस’ या क्रूझ जहाजावर हंटा व्हायरसचे अनेक संशयित आणि काही पुष्टी झालेले रुग्ण आढळल्याने जागतिक आरोग्य संघटना (WHO) तसेच विविध देशांच्या आरोग्य यंत्रणा सतर्क झाल्या आहेत. काही मृत्यू झाल्याची माहिती समोर आल्यानंतर या घटनेने मोठी खळबळ उडाली आहे.
मिळालेल्या माहितीनुसार, जहाजावरील काही प्रवाशांना ताप, श्वास घेण्यास त्रास, अंगदुखी आणि तीव्र अशक्तपणा जाणवत असल्याने त्यांची तपासणी करण्यात आली. त्यानंतर काही प्रवाशांमध्ये हंटा व्हायरसची लागण झाल्याचे स्पष्ट झाले. यानंतर जहाजावरील सर्व प्रवाशांचा संपर्क इतिहास तपासण्याचे काम सुरू करण्यात आले असून विविध देशांतील आरोग्य संस्था प्रवाशांचा शोध घेत आहेत.
हंटा व्हायरस हा प्रामुख्याने उंदीर आणि इतर कृंतक प्राण्यांमधून पसरणारा विषाणू मानला जातो. संक्रमित प्राण्यांच्या लघवी, विष्ठा किंवा लाळ यांच्या संपर्कातून हा संसर्ग मानवांमध्ये पसरतो. काही गंभीर प्रकरणांमध्ये फुफ्फुसांवर परिणाम होऊन रुग्णांची प्रकृती अत्यंत चिंताजनक बनू शकते. डॉक्टरांच्या माहितीनुसार, ताप, डोकेदुखी, स्नायूंमध्ये वेदना, उलट्या, जुलाब आणि श्वसनाचा त्रास ही या आजाराची प्रमुख लक्षणे आहेत.
दरम्यान, भारतात अद्याप हंटा व्हायरसचा मोठा उद्रेक झाल्याची अधिकृत नोंद नसली तरी आंतरराष्ट्रीय स्तरावर वाढत असलेल्या घटनांमुळे केंद्र आणि राज्य आरोग्य विभाग सतर्क झाले आहेत. जागतिक आरोग्य संघटनेने सध्या या विषाणूचा जागतिक धोका “कमी” असल्याचे स्पष्ट केले असले तरी नागरिकांनी स्वच्छता आणि आरोग्याची विशेष काळजी घेण्याचे आवाहन करण्यात आले आहे.
