साडेचार वर्षांच्या बालिकेचा विनयभंग
भानखेडा येथील घटना, आरोपीविरुद्ध पॉक्सोअंतर्गत गुन्हा दाखल
भुसावळ (विशेष प्रतिनिधी): भुसावळ तालुक्यातील भानखेडा येथे एक अत्यंत संतापजनक घटना समोर आली आहे. अवघ्या साडेचार वर्षांच्या (४ वर्षे ६ महिने) चिमुकलीला आमिष दाखवून तिचे अपहरण करत तिचा विनयभंग करण्यात आल्याची घटना घडली आहे. १८ ऑगस्ट २०२६ रोजी सकाळी ११.०० ते दुपारी १२.०० वाजेच्या दरम्यान ही घटना घडली असून या प्रकरणी भुसावळ तालुका पोलीस ठाण्यात आरोपीविरुद्ध भारतीय न्याय संहिता (BNS) आणि पॉक्सो (POCSO) कायद्यान्वये गुन्हा दाखल करण्यात आला आहे.
येथील रहिवासी असलेल्या २४ वर्षीय गृहिणीने दिलेल्या तक्रारीनुसार, १८ ऑगस्ट रोजी सकाळी ११ वाजेच्या सुमारास त्यांची साडेचार वर्षांची मुलगी घरासमोर खेळत होती. या वेळी संशयित आरोपी धनराज दगडू जंगले (रा. जोगलखेडा, ता. भुसावळ, जि. जळगाव) याने बालिकेला काहीतरी आमिष दाखवले आणि घरासमोरून पळवून नेले.
त्यानंतर आरोपीने तिला स्वतःच्या राहत्या घरात बंद करून वाईट उद्देशाने तिच्या डोक्यावरून, पाठीवरून आणि छातीवरून हात फिरवून तिचा विनयभंग केला. हा प्रकार लक्षात आल्यानंतर पीडित मुलीच्या आईने भुसावळ तालुका पोलीस ठाण्यात धाव घेऊन तक्रार नोंदवली.
आरोपीवर पॉक्सोअंतर्गत गुन्हा दाखल
पीडित बालिकेच्या आईच्या फिर्यादीवरून १८ ऑगस्ट रोजी रात्री २१:०४ वाजता भुसावळ तालुका पोलीस ठाण्यात गुन्हा (गु.र.नं. १५३/२०२६) नोंदवण्यात आला आहे. संशयित आरोपी धनराज जंगले याच्याविरुद्ध भारतीय न्याय संहिता (BNS) कलम ७५(२), १३७(२), १२७(२) तसेच बालकांचे लैंगिक अपराधांपासून संरक्षण कायदा (POCSO) कलम १० व १२ अन्वये गुन्हा दाखल करण्यात आला आहे.
