बारामतीतील खत कंपनीकडून अवैध खत विक्री अन् शासनाची फसवणूक; जळगाव तालुका पोलिसांत गुन्हा दाखल
जळगाव (विशेष प्रतिनिधी): विनापरवाना खतसदृश उत्पादनांची निर्मिती करून त्यांची अवैध वाहतूक, विक्री व वितरण करत शासनाची दिशाभूल आणि शेतकऱ्यांची फसवणूक केल्याचा धक्कादायक प्रकार उघडकीस आला आहे. या प्रकरणी जळगाव तालुका पोलीस ठाण्यात बारामती (जि. पुणे) येथील नामांकित बायोकॅम कंपनीचे संचालक आणि प्रॉडक्शन मॅनेजर यांच्याविरुद्ध विविध गंभीर कलमांन्वये गुन्हा दाखल करण्यात आला आहे.
मिळालेल्या माहितीनुसार, जळगाव तालुक्यातील भादली/नांद्रा बुद्रुक येथील ‘कृषी सेवा केंद्रात’ १४ जुलै २०२६ रोजी तपासणीदरम्यान अवैध खतसाठा आढळून आला होता. याप्रकरणी कृषी विभागाच्या वतीने सखोल चौकशी करण्यात आली. चौकशीअंती मे. जयकिसन बायोकेम फर्टिलायझर्स (एल.एल.पी., एम.आय.डी.सी. बारामती, जि. पुणे) या कंपनीने कोणत्याही वैध परवान्याशिवाय खतसदृश उत्पादनांची निर्मिती केली. तसेच विनापरवाना विक्री व वाहतूक करून शासनाची दिशाभूल करत फसवणूक केल्याचे निष्पन्न झाले.
याप्रकरणी पंचायत समिती जळगावचे गुणवत्ता नियंत्रण निरीक्षक तथा कृषी अधिकारी लक्ष्मण अभिमन पाटील (वय ५३) यांनी दिलेल्या तक्रारीवरून ८ ऑगस्ट २०२६ रोजी रात्री ८:३९ वाजेच्या सुमारास जळगाव तालुका पोलीस ठाण्यात गुन्हा दाखल करण्यात आला आहे.
यांच्यावर झाला गुन्हा दाखल: १. संचालक – मे. जयकिसन बायोकेम फर्टिलायझर्स, बारामती (जि. पुणे) २. जयप्रकाश नारायण फडतरे (वय ४५, प्रॉडक्शन मॅनेजर, रा. एम.आय.डी.सी. बारामती, जि. पुणे)
दाखल कलमे: आरोपींविरुद्ध भारतीय न्याय संहिता (BNS) २०२३ चे कलम ३१८(४) (फसवणूक), खत नियंत्रण आदेश १९८५ चे विविध कलमे (४, ५, ६, ९, ११, १२, १४, १५, १९-A, १९-B, २५(१) व ३५(१)A) तसेच अत्यावश्यक वस्तू अधिनियम १९५५ चे कलम ३ मधील उपकलमांन्वये गुन्हा नोंदवण्यात आला आहे (गुन्हा रजि. नं. २२३/२०२६).
घटनेची माहिती मिळताच जळगाव तालुका पोलीस ठाण्याचे पोलीस निरीक्षक श्री. शशिकांत पाटील यांनी घटनास्थळी भेट दिली असून, ते स्वतः या प्रकरणाचा पुढील सखोल तपास करत आहेत.
