कुऱ्हा येथे चालकानेच केला १ लाखाचा ट्रॅक्टर अन् ट्रॉली लांबवून विश्वासघात; भुसावळ तालुका पोलिसांत गुन्हा दाखल
भुसावळ (विशेष प्रतिनिधी): विश्वासाने चालवण्यासाठी दिलेल्या १ लाख रुपये किमतीचा ट्रॅक्टर आणि ट्रॉली बेकायदेशीरपणे पळवून नेऊन मालकाचा विश्वासघात केल्याची घटना घडली आहे. भुसावळ तालुक्यातील कुऱ्हा येथे १ ऑगस्ट २०२६ रोजी रात्री १०:३० वाजेच्या सुमारास हा प्रकार घडला असून, याप्रकरणी परप्रांतीय चालकाविरुद्ध भुसावळ तालुका पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, दिनेश पंडित पाटील (वय ४९, व्यवसाय- खडी मशीन मालक, रा. कुऱ्हा पानाचे, ता. भुसावळ) यांच्या खडी मशीनवर आरोपी कुंदन रूकमनसिंग (रा. झारखंड) हा चालक म्हणून कामाला होता. दिनेश पाटील यांनी विश्वासाने त्यांच्या मालकीचा निळ्या रंगाचा स्वरांज कंपनीचा ट्रॅक्टर (क्र. MH 19 CV 9807) व ट्रॉली (एकूण किंमत १,००,००० रुपये) चालक कुंदन याच्या ताब्यात दिला होता. मात्र, १ ऑगस्ट रोजी रात्री आरोपी कुंदन याने सदर ट्रॅक्टर व ट्रॉली बेकायदेशीर हेतूने स्वतःसोबत पळवून नेऊन मालकाचा विश्वासघात केला.
बराच शोध घेऊनही ट्रॅक्टर व चालक न सापडल्याने अखेर दिनेश पाटील यांनी भुसावळ तालुका पोलीस ठाण्यात धाव घेऊन तक्रार नोंदवली. त्यांच्या फिर्यादीवरून ८ ऑगस्ट २०२६ रोजी दुपारी १:५६ वाजेच्या सुमारास आरोपी कुंदन रूकमनसिंग याच्याविरुद्ध भारतीय न्याय संहिता (BNS) कलम ३१६(४) अन्वये गुन्हा नोंदवण्यात आला आहे (गुन्हा रजि. नं. १४३/२०२६).
घटनेची माहिती मिळताच पोलीस निरीक्षक निलेश गायकवाड यांनी मार्गदर्शन केले असून, पोलीस हेड कॉन्स्टेबल धीरज मंडलिक (पोहेकॉ/२८८९, मो. ९६२३४४२८८९) या प्रकरणाचा पुढील तपास करत आहेत.
