भुसावळ शहरातील घटना
भुसावळ (प्रतिनिधी) : – ऐन विजयादशमीच्या सणाच्या दिवशी भुसावळ शहरामध्ये खुनाची घटना उघड झाली आहे. जुन्या वादातून शहरातील इसमाची डोक्यात लोखंडी रॉड टाकून निर्घूण हत्या करण्यात आली आहे. याप्रकरणी भुसावळ शहर पोलीस स्टेशनला गुन्हा दाखल करण्याचे काम सुरू होते.
दिलीप रामलाल जोनवाल (५३, रा.महात्मा फुले नगर) यांचा डोक्यात लोखंडी रॉड मारून निर्घृृण खून करण्यात आला. ही घटना शहर पोलिस ठाणे हद्दीतील गरूड प्लॉट भागातील क्रांती चौकात मंगळवारी रात्री ११ वाजेच्या सुमारास घडली. शहरातील गवळीवाडा भागातील दोन संशयित आरोपींसोबत दिलीप जोनवाल यांचे जुने वाद होते व त्या वादातून मंगळवारी जोनवाल यांच्या डोक्यावर संशयितांनी लोखंडी पाईपाने प्रहार करीत त्यांची हत्या केली. हत्येनंतर संशयित पसार झाले.
जोनवाल हे माहिती अधिकार कार्यकर्ता म्हणूनही परीचीत होते. हत्येप्रकरणी एका संशयिताला ताब्यात घेण्यात आल्याचे समजते. पोलिस उपअधीक्षक कृष्णात पिंगळे, शहरचे सहाय्यक निरीक्षक अनिल मोरे व सहकार्यांनी घटनास्थळी धाव घेत पाहणी केली व मृतदेह शवविच्छेदनासाठी ग्रामीण रुग्णालयात हलवला. मागील महिन्यात कुविख्यात गुन्हेगार निखील राजपूतची त्याची शालकाने कौटुंबिक वादातून हत्या केली होती तर कंडारी येथे जुन्या वादातून तिघांची हत्या करण्यात आली होती. त्यातच एका तरुणाची नातेवाईकांनी हत्या केली होती. आता पुन्हा हत्याकांड झाल्यामुळे भुसावळ चर्चेत आले आहे.
