‘आधुनिक आवर्त सारणी’ शैक्षणिक साहित्याची जिल्हास्तरीय विज्ञान प्रदर्शनासाठी निवड
जळगाव (प्रतिनिधी) :- भादली बु. येथे आयोजित तालुकास्तरीय विज्ञान प्रदर्शनात बारी समाज माध्यमिक व उच्च माध्यमिक विद्यालयातील शिक्षिका श्रीमती दिपाली कल्याणराव पाटील यांनी उल्लेखनीय यश संपादन केले आहे. माध्यमिक शिक्षकांचे शैक्षणिक साहित्य या गटातून त्यांनी सादर केलेल्या ‘आधुनिक आवर्त सारणी’ या शैक्षणिक साहित्याला प्रथम क्रमांक मिळाला आहे. या यशामुळे त्यांची जिल्हास्तरीय विज्ञान प्रदर्शनासाठी निवड झाली आहे.
विज्ञान विषय अधिक सोप्या, रंजक आणि प्रभावी पद्धतीने विद्यार्थ्यांपर्यंत पोहोचविण्यासाठी शैक्षणिक साहित्याची महत्त्वपूर्ण भूमिका असते. दिपाली पाटील यांनी तयार केलेल्या आधुनिक आवर्त सारणी या साहित्याला मिळालेला प्रथम क्रमांक हा त्यांच्या शैक्षणिक कल्पकतेचा आणि नावीन्यपूर्ण दृष्टिकोनाचा गौरव मानला जात आहे.
या यशाबद्दल संस्थेचे अध्यक्ष ॲड. निलेश खलसे, सचिव सुरेश अस्वार, शालेय समितीचे चेअरमन दिलीप बारी, मुख्य कार्यकारी अधिकारी मनोज बारी, खजिनदार कमलाकर तांदळे तसेच संस्थेच्या सर्व संचालक मंडळाने त्यांचे अभिनंदन केले.
विद्यालयाचे मुख्याध्यापक राजेंद्र आंबटकर, प्रभारी पर्यवेक्षक सुनील भदाणे, सर्व शिक्षक आणि शिक्षकेतर कर्मचाऱ्यांनीही दिपाली पाटील यांचे कौतुक करून पुढील वाटचालीस शुभेच्छा दिल्या.
जिल्हास्तरीय विज्ञान प्रदर्शनासाठी निवड झाल्याने विद्यालयाच्या शैक्षणिक क्षेत्रातील यशात आणखी एक मानाचा तुरा रोवला गेला आहे. त्यांच्या या यशाबद्दल सर्व स्तरांतून अभिनंदनाचा वर्षाव होत आहे.
