जळगावच्या मध्यवर्ती भागात चोरट्यांचा धुमाकूळ
जळगाव : शहरातील मध्यवर्ती भाग असलेल्या शनिपेठ परिसरात भिलपुरा पोलीस चौकीच्या अगदी समोर चोरट्यांनी मंगळवारी (दि. २८) पहाटे चार वाजेच्या सुमारास जोरदार धुमाकूळ घातला. चोरट्यांनी एकाच रांगेतील तीन दुकाने फोडण्याचा प्रयत्न केला असून, यात ‘पद्मालय मेडिकल’मधून रोख रकमेसह साहित्याची चोरी केली आहे. विशेष म्हणजे, एका सतर्क नागरिकाने या चोरट्यांचा पाठलाग केला, मात्र चोरटे पसार होण्यात यशस्वी झाले.
मंगळवारी पहाटे ४ वाजेच्या सुमारास कारमधून आलेल्या तीन संशयित चोरट्यांनी शनिपेठ परिसरात भिलपुरा पोलीस चौकी समोरचे मेडिकल दुकान लक्ष्य केले. त्यांनी येथील पद्मालय मेडिकलचे कुलूप आणि कोंडा न तोडता शटर वाकवून आत प्रवेश केला. दुकानाच्या गल्ल्यातील साधारण ८ ते १० हजार रुपयांची रोकड, १६ कॅमेऱ्यांचा डीव्हीआर (DVR), कोल्ड्रिंक्सच्या बाटल्या आणि आईस्क्रीम असा मुद्देमाल चोरट्यांनी लांबवला. यानंतर त्यांनी शेजारील इतर दोन दुकानेही फोडण्याचा प्रयत्न केला, मात्र त्यात त्यांना यश आले नाही.
नागरिकाने केला पाठलाग
चोरी होत असताना परिसरातील एका नागरिकाला जाग आली. त्याने प्रसंगावधान राखून चोरट्यांचा पाठलाग केला. ममुराबाद पुलाखालील मंदिरापर्यंत हा पाठलाग सुरू होता, मात्र चोरटे कारमध्ये असल्याने वेगाने पसार झाले. या सतर्क नागरिकाने चोरट्यांच्या कारचा क्रमांक नोट केला असून, तो एमएच ०२ बीवाय ३०३२ असा आहे, अशी माहिती मेडिकलचे मालक दिलीप वाणी यांनी “केसरीराज” शी बोलताना दिली.
पोलीस तपासाला वेग
शनिपेठ पोलीस स्टेशनपासून हा परिसर हाकेच्या अंतरावर आहे. पोलीस चौकीसमोरच चोरीची घटना घडल्याने व्यापाऱ्यांमध्ये आणि नागरिकांमध्ये भीतीचे वातावरण पसरले आहे. याप्रकरणी पद्मालय मेडिकलचे संचालक दिलीप अनंत वाणी यांच्या फिर्यादीवरून गुन्हा दाखल करण्याची प्रक्रिया सुरू करण्यात आली आहे. कारचा नंबर आणि सीसीटीव्ही फुटेजच्या आधारे पोलीस चोरट्यांचा शोध घेत आहेत. शहराच्या मुख्य भागात चोरटे इतक्या हिंमतीने कारने येऊन चोरी करत असल्याने पोलिसांनी गस्त वाढवावी आणि या गुन्ह्याचा छडा लवकरात लवकर लावावा, अशी मागणी रहिवाशांनी केली आहे.
