सात बकऱ्या आणि चार बोकडांची चोरी; १.३० लाखांचा मुद्देमाल जप्त
चोपडा | प्रतिनिधी
चोपडा शहरातील पंचशीलनगर परिसरात घरफोडी करून सात बकऱ्या आणि चार बोकड चोरीला गेल्याची घटना १९ ऑगस्ट रोजी पहाटे उघडकीस आली. या प्रकरणी चोपडा शहर पोलिसांनी संशयित आरोपीला ताब्यात घेत चोरीस गेलेला सुमारे १ लाख ३० हजार रुपयांचा मुद्देमाल हस्तगत केला आहे.
पोलिसांनी दिलेल्या माहितीनुसार, पंचशीलनगर येथील तक्रारदार अरुण दत्तू बाविस्कर (वय ४५) यांच्या जुन्या मातीच्या बंद घराला लागून असलेल्या घराच्या लाकडी दरवाजाची कडी तोडून चोरट्याने आत प्रवेश केला. घराच्या मागील बाजूस दोरीच्या दावणीने बांधलेल्या सात बकऱ्या आणि चार बोकड चोरून नेण्यात आले.
चोरीस गेलेल्या सात बकऱ्यांची अंदाजे किंमत ७० हजार रुपये, तर चार बोकडांची किंमत सुमारे ६० हजार रुपये असल्याचे तक्रारीत नमूद करण्यात आले. अशा प्रकारे एकूण १ लाख ३० हजार रुपयांचा मुद्देमाल चोरीस गेला होता.
घटनेची माहिती मिळताच चोपडा शहर पोलिसांनी तपास सुरू केला. तपासादरम्यान सचिन एकनाथ सपकाळे (वय ३५, रा. भिलवाडा, चोपडा) याच्यावर संशय बळावल्याने त्याला ताब्यात घेण्यात आले. त्याच्याकडून चोरीस गेलेल्या बकऱ्या आणि बोकडांचा मुद्देमाल हस्तगत करण्यात आला आहे.
या प्रकरणी चोपडा शहर पोलीस ठाण्यात भारतीय न्याय संहितेच्या कलम ३३१(४) आणि ३०५(अ) नुसार गुन्हा दाखल करण्यात आला आहे. पुढील तपास पोलीस उपनिरीक्षक युवराज वाळुंज यांच्या मार्गदर्शनाखाली सुरू आहे.
