शेताच्या बांधाच्या वादातून वृद्ध शेतकऱ्यासह कुटुंबीयांना मारहाण
वाहनाचीही तोडफोड, चोपडा ग्रामीण पोलिसांत गुन्हा
चोपडा (प्रतिनिधी) : तालुक्यातील हाटेड बुद्रुक शिवारात शेताच्या बांधाच्या वादातून वृद्ध शेतकरी, त्यांच्या दोन्ही मुलांसह सुनेला मारहाण करून जीवे मारण्याची धमकी देत चारचाकी वाहनाची तोडफोड केल्याची घटना घडली. याप्रकरणी सहा नामनिर्देशित व चार ते पाच अनोळखी व्यक्तींविरुद्ध चोपडा ग्रामीण पोलीस ठाण्यात गुन्हा दाखल करण्यात आला आहे.
पोलीसांनी दिलेल्या माहितीनुसार, हाटेड बुद्रुक येथील गट क्रमांक ५९९ मधील शेतात २६ जून रोजी सकाळी ८ ते ९ वाजेच्या दरम्यान ही घटना घडली. फिर्यादी शालिक ओंकार बाविस्कर (वय ७२, रा. हाटेड बुद्रुक, ता. चोपडा) यांनी दिलेल्या फिर्यादीनुसार, शेताच्या बांधाच्या कारणावरून वाद झाल्यानंतर आरोपींनी हातात काठ्या घेऊन शेतात बेकायदेशीर प्रवेश केला. त्यानंतर फिर्यादी, त्यांचे दोन्ही मुलगे व सुनेला मारहाण करून शिवीगाळ केली तसेच जीवे मारण्याची धमकी दिली. यावेळी फिर्यादींच्या मुलाच्या एमएच-१९-बीजे-३९०३ क्रमांकाच्या टाटा मॅजिक वाहनाच्या समोरील काचेची तोडफोड करून नुकसान केल्याचे फिर्यादीत नमूद करण्यात आले आहे.
याप्रकरणी समाधान भगवान बाविस्कर, आकाश कोळी, राहुल कोळी, समाधान बाविस्कर यांची आई, त्यांची बहीण तसेच चार ते पाच अनोळखी व्यक्ती यांच्याविरुद्ध चोपडा ग्रामीण पोलीस ठाण्यात गुन्हा क्रमांक १२६/२०२६ अन्वये भारतीय न्याय संहिता २०२३ मधील विविध कलमानुसार गुन्हा दाखल करण्यात आला आहे.या प्रकरणाचा पुढील तपास पोलीस कर्मचारी संदीप अशोक नन्नवरे करीत असून, घटनेच्या वृत्तापर्यंत कोणालाही अटक करण्यात आलेली नव्हती.
