देवळी परिसरातील घटना; घरासमोरील मोकळ्या जागेतून चोरट्यांनी दुचाकी लांबवली
चाळीसगाव ( प्रतिनिधी ) – चाळीसगाव तालुक्यातील देवळी (डोन शिवार) परिसरात घरासमोरील मोकळ्या जागेत उभी केलेली सुमारे ६० हजार रुपये किमतीची दुचाकी अज्ञात चोरट्याने चोरून नेल्याची घटना उघडकीस आली आहे. याप्रकरणी चाळीसगाव ग्रामीण पोलीस ठाण्यात अज्ञात चोरट्याविरुद्ध गुन्हा दाखल करण्यात आला आहे.
याबाबत मिळालेल्या माहितीनुसार, आकाश दत्तू पाटील (वय ३१, व्यवसाय मजुरी, रा. देवळी, डोन शिवार, ता. चाळीसगाव) यांनी आपली सुझुकी कंपनीची जिक्सर मोटारसायकल घरासमोरील मोकळ्या जागेत उभी केली होती. ७ नोव्हेंबर रोजी सकाळी ४.३० ते ७ वाजेदरम्यान अज्ञात चोरट्याने संधी साधून ही दुचाकी चोरून नेली.
चोरीस गेलेल्या दुचाकीची किंमत अंदाजे ६० हजार रुपये असल्याचे तक्रारीत नमूद करण्यात आले आहे. याप्रकरणी ८ नोव्हेंबर रोजी चाळीसगाव ग्रामीण पोलीस ठाण्यात गुन्हा रजिस्टर क्रमांक ३३४/२०२६ अन्वये भारतीय न्याय संहितेच्या कलम ३०३(२) प्रमाणे गुन्हा दाखल करण्यात आला आहे.
या प्रकरणाचा पुढील तपास पोलीस उपनिरीक्षक विजय माळी करीत आहेत.
