ग्रामस्थांकडून संताप व्यक्त, नाशिकच्या खासगी रुग्णालयात उपचार सुरू
जळगाव (प्रतिनिधी) – वाळू व्यवसायातील स्पर्धेतून भडगाव येथे वाळूमाफियांमध्ये तुफान राडा होऊन गोळीबार झाल्याची घटना रविवारी दि. ८ रोजी पहाटे घडली. या गोळीबारात वाळू व्यावसायिक जखमी झाले असून, जखमींची प्रकृती गंभीर असल्याचे समजते. जखमींचे नाव लकीचंद पाटील असल्याचे सांगण्यात येते. या प्रकरणावर पडदा टाकण्यासाठी प्रयत्न सुरू असल्याची चर्चा असून, घटनेमुळे परिसरात खळबळ उडाली आहे.
भडगाव तालुक्यात मोठ्या प्रमाणात वाळूची तस्करी आणि वाहतूक होत असते. पोलिसांच्या भागीदारीत चालणाऱ्या या व्यवसायात भडगावातील सत्ताधारी पुढाऱ्यांचाही समावेश असल्याची चर्चा आहे. गेल्या काही दिवसांपासून भडगावचे स्थानिक आणि धुळ्यातील वाळूमाफियांच्या गटात धुसफूस सुरू होती.
रात्रभर गिरणा नदीपात्रातून वाळूचा उपसा आणि उत्खनन होत असल्याने पहाटे संबंधित वाळू व्यावसायिक पुढाऱ्याला फोन करून बोलावण्यात आले. भडगाव-कडगाव रोडवर वरधा कराव फाट्यावर वाद होऊन धुळ्याच्या टोळीकडून झालेल्या गोळीबारात स्थानिक वाळू व्यावसायिक गंभीर जखमी झाला आहे. घटना घडल्यानंतर वाळू व्यावसायिकांबरोबर रात्रीच्या ड्युटीवर असलेल्या पोलिसांनी जखमीला जळगावला न जाऊ देता थेट नाशिक येथील खासगी रुग्णालयात नेल्याचे सांगण्यात येत आहे.याबाबत भडगाव पोलीसात कुठलीही तक्रार नसल्याचे समजते
