चाळीसगाव शहर पोलीस स्टेशनची कामगिरी
चाळीसगाव (प्रतिनिधी) : येथील चाळीसगाव शहर पोलीस स्टेशनच्या कर्मचाऱ्यांनी गोपनीय माहितीवरून हॉटेलमधून एका तरुणाला अटक केली. त्याच्याकडून गावठी पिस्टल आणि २ जिवंत काडतूस जप्त करण्यात आले आहे.
पोलीस उपनिरीक्षक संदीप घुले, पोहेकॉ योगेश बेलदार, पो.हे.कॉ. राकेश पाटील, पो.हे.कॉ. अजय पाटील, पो.ना. नितीन आगोणे व पोकॉ. निलेश पाटील हे चाळीसगाव शहरात गस्त घालत असताना उपनिरीक्षक संदीप घुले यांना गोपनीय बातमीदारामार्फत माहिती मिळाली. हॉटेल विराम परमिटरूम बार, स्टेशन रोड, चाळीसगाव येथे एक इसम गावठी कट्टा बाळगून आहे. त्यानुसार, पोलिसांनी तत्काळ घटनास्थळी जाऊन सापळा रचला. किरण कैलास गायकवाड (वय २१, रा. संवसर, ता. कोपरगाव, जि. अहिल्यानगर, सध्या शिर्डी बायपास, खंडोबा मंदिर जवळ, ता. राहता, जि. अहिल्यानगर) याला ताब्यात घेतले.
झडती घेतली असता त्याच्याकडे १ गावठी पिस्टल व २ जीवंत काडतुसे असा एकूण ३२ हजार किंमतीचा मुद्देमाल आढळून आला. याबाबत पंचनामा करून पोलिसांनी शस्त्र व काडतुसे जप्त केली. सदर इसमाविरुद्ध चाळीसगाव शहर पोलीस ठाण्यात गुन्हा दाखल करण्यात आला आहे. सदर कारवाई पोलीस अधीक्षक महेश्वर रेड्डी, अपर पोलीस अधीक्षक कविता नेरकर आणि उपविभागीय पोलीस अधिकारी राजेशसिंह चंदेल यांच्या मार्गदर्शनाखाली पोलीस निरीक्षक किरणकुमार कबाडी यांचे वरील पथकाद्वारे करण्यात आली. सदर गुन्ह्याचा पुढील तपास उपनिरीक्षक संदीप घुले व पो.हे.कॉ. राकेश पाटील, चाळीसगाव शहर पोलीस ठाणे करीत आहेत.
