वृद्धासाठी वाहन फलाटावर नेल्याचे चौकशीत स्पष्ट
जळगाव (प्रतिनिधी) : मध्य रेल्वेच्या भुसावळ विभागांतर्गत अमरावती रेल्वे स्थानकाच्या फलाट क्रमांक १ वर खासगी वाहनाच्या अनधिकृत प्रवेशाचे प्रकरण समोर आले आहे. १८ सप्टेंबर २०२६ रोजी घडलेल्या या प्रकाराची रेल्वे सुरक्षा दलाने (आरपीएफ) तातडीने दखल घेत कारवाई केली.
फलाटावर MH 05 AJ 1212 क्रमांकाचे खासगी वाहन आढळून आल्यानंतर आरपीएफ कर्मचाऱ्यांनी वाहनाची तपासणी करून संबंधित व्यक्तीची चौकशी केली. रेल्वे अधिकाऱ्यांनीही घटनास्थळी माहिती घेत वाहन फलाटावर आणण्यामागील नेमके कारण जाणून घेतले.
चौकशीदरम्यान संबंधित व्यक्तीने दिलेल्या माहितीनुसार, ८० वर्षीय अस्वस्थ प्रवाशाला चालण्यास अडचण येत असल्याने त्याला अमरावती–मुंबई एक्स्प्रेसमध्ये चढविण्यासाठी वाहन पार्सल गेटमार्गे फलाटावर नेण्यात आले होते.
मात्र, फलाट परिसरात खासगी वाहनांना अनधिकृत प्रवेशास परवानगी नसल्याने आरपीएफकडून या प्रकरणाची नोंद घेण्यात आली. रेल्वे अधिनियमातील कलम १४७ आणि १५९ अंतर्गत लागू तरतुदींनुसार संबंधितावर कारवाई करण्यात आली असून, नियमानुसार दंड आकारण्यात आला.
अनधिकृत वाहन प्रवेशाला आळा घालण्यासाठी रेल्वेची सतर्कता
भुसावळ विभागाने स्पष्ट केले आहे की, फलाट परिसरात खासगी वाहनांची अनधिकृत ये-जा करण्यास परवानगी नाही. अशा प्रकारच्या वाहनांच्या हालचालींमुळे प्रवाशांच्या सुरक्षिततेला धोका निर्माण होण्याबरोबरच स्थानकातील रेल्वे परिचालनावरही परिणाम होऊ शकतो.
रेल्वे स्थानकांवर आरपीएफ व रेल्वे कर्मचारी सतर्क असून, नियमांचे उल्लंघन निदर्शनास आल्यास नियमानुसार तत्काळ कारवाई केली जात असल्याचे विभागाकडून सांगण्यात आले.
प्रवाशांना नियमांचे पालन करण्याचे आवाहन
प्रवाशांची सुरक्षा ही रेल्वेची सर्वोच्च प्राथमिकता असल्याचे भुसावळ विभागाने स्पष्ट केले आहे. प्रवासी व नागरिकांनी रेल्वे स्थानकातील प्रवेश नियंत्रण व्यवस्था, रेल्वेचे नियम तसेच रेल्वे आणि आरपीएफ कर्मचाऱ्यांच्या सूचनांचे काटेकोरपणे पालन करावे, असे आवाहन करण्यात आले आहे.
