१७ वर्षीय मुलीला गर्भवती केल्याचा आरोप; पतीसह आईवडिलांविरुद्ध पोक्सो व बालविवाह कायद्यान्वये कारवाई
जळगाव ( प्रतिनिधी ) – अल्पवयीन मुलीशी विवाह करून तिच्यावर शारीरिक अत्याचार केल्याप्रकरणी जळगाव एमआयडीसी पोलीस ठाण्यात पोक्सो कायदा आणि बालविवाह प्रतिबंधक कायद्यान्वये गुन्हा दाखल करण्यात आला आहे. या प्रकरणात मुलीच्या पतीसह संबंधित व्यक्तींविरुद्ध कायदेशीर कारवाई करण्यात आली आहे.
पोलिसांनी दिलेल्या माहितीनुसार, पीडित मुलगी १७ वर्षांची आहे. ती धानवड, ता. जि. जळगाव येथील रहिवासी असल्याचे नमूद करण्यात आले आहे. तिचा विवाह भूषण मोरे याच्यासोबत झाल्याचे तक्रारीत नमूद आहे.
तक्रारीनुसार, मुलगी अल्पवयीन असल्याची माहिती असतानाही तिच्यासोबत विवाह करण्यात आला. त्यानंतर पती-पत्नीप्रमाणे राहून तिच्याशी शारीरिक संबंध प्रस्थापित करण्यात आले. या प्रकारातून मुलगी गर्भवती झाल्याचा आरोप तक्रारीत करण्यात आला आहे.
या प्रकरणी एमआयडीसी पोलीस ठाण्यात गुन्हा रजिस्टर क्रमांक ७६२/२०२६ नुसार भारतीय न्याय संहितेतील कलम ६४(२)(एम), पोक्सो कायद्यातील कलम ४ व ६ तसेच बालविवाह प्रतिबंधक कायद्यातील कलम ६ व ९ अन्वये गुन्हा दाखल करण्यात आला आहे.
पोलिसांच्या नोंदीनुसार, बदनापूर पोलीस ठाणे, जि. जालना येथून प्राप्त माहितीनंतर संबंधित तक्रारीच्या आधारे जळगाव एमआयडीसी पोलीस ठाण्यात गुन्हा दाखल करण्यात आला. मुलगी अल्पवयीन असल्याची माहिती असतानाही तिचा विवाह करून तिच्यासोबत वैवाहिक संबंध ठेवण्यात आल्याचा आरोप तक्रारीत करण्यात आला आहे. या प्रकरणाचा तपास महिला पोलीस उपनिरीक्षक राजश्री पाटील, एमआयडीसी पोलीस ठाणे, जळगाव करीत आहेत.
