सरकारी कामात अडथळा आणल्याप्रकरणी गुन्हा दाखल
जळगाव ( प्रतिनिधी ):- महावितरण कंपनीच्या टेंडरची गोपनीय माहिती देण्यास नकार दिल्याने सहाय्यक अभियंत्याला त्यांच्याच केबिनमध्ये शिरून मारहाण केल्याचा धक्कादायक प्रकार जळगावात घडला आहे. याप्रकरणी जिल्हापेठ पोलीस ठाण्यात शासकीय कामात अडथळा आणल्याप्रकरणी एकाविरुद्ध गुन्हा दाखल करण्यात आला आहे.
संदीपकुमार रणछोड बडगुजर (वय ५७, रा. लेक रेसिडेन्सी, मेहरूण) हे जळगाव विभागातील महावितरण कंपनीच्या दीक्षितवाडी येथील कार्यालयात सहाय्यक अभियंता म्हणून कार्यरत आहेत. सोमवारी, २० एप्रिल रोजी दुपारी १२:०० ते १२:१८ वाजेच्या सुमारास बडगुजर हे आपल्या केबिनमध्ये शासकीय कामकाज करत होते. यावेळी संशयित आरोपी संजय रामभाऊ वराडे (रा. चिंचोली, ता. जळगाव) हा त्यांच्या केबिनमध्ये शिरला. त्याने बडगुजर यांच्याकडे ‘एमएसईबी’च्या टेंडर संदर्भात काही गोपनीय माहिती मागितली.
मात्र, ही माहिती देणे नियमात नसल्याने बडगुजर यांनी नकार दिला. माहिती देण्यास नकार दिल्याने संतापलेल्या संजय वराडे याने त्यांच्याशी अरेरावी करण्यास सुरुवात केली. संजय वराडे याने रागाच्या भरात अभियंता संदीपकुमार बडगुजर यांच्या शर्टची कॉलर ओढून त्यांचा शर्ट फाडला आणि बटणे तोडली. इतक्यावरच न थांबता त्याने त्यांना चापटबुक्क्यांनी मारहाण करून जीवे मारण्याची धमकी दिली. तसेच केबिनमधील शासकीय फाईल्स अस्ताव्यस्त फेकून देऊन गोंधळ घातला. “तुम्ही माझ्या बोटातील सोन्याची अंगठी काढली, अशी खोटी तक्रार मी तुमच्याविरुद्ध देईन,” अशी धमकीही त्याने यावेळी दिली.
या घटनेनंतर संदीपकुमार बडगुजर यांनी तातडीने जिल्हापेठ पोलीस ठाण्यात धाव घेऊन तक्रार दिली. त्यावरून पोलिसांनी आरोपी संजय वराडे याच्याविरुद्ध शासकीय कामात अडथळा आणल्याप्रकरणी गुन्हा दाखल केला आहे. जिल्हापेठ पोलीस ठाण्याचे प्रभारी पोलीस निरीक्षक अनिल वाघ यांच्या मार्गदर्शनाखाली पोलीस उपनिरीक्षक संजय भांडारकर हे या प्रकरणाचा अधिक तपास करत आहेत. शासकीय कार्यालयात अधिकाऱ्याला झालेल्या या मारहाणीमुळे महावितरण कर्मचाऱ्यांमध्ये संतापाचे वातावरण आहे.
