भुसावळ शहरातील घटना
भुसावळ (प्रतिनिधी) :- पत्नीला शिविगाळ केल्याचा पतीने जाब विचारल्यानंतर पत्रकारासह तिघांना गुंड प्रवृत्तीच्या चौघांनी शिविगाळ करीत मारहाण केली. ही घटना रविवारी रात्री आठ वाजता शहरातील महेश नगरात घडली. याप्रकरणी चौघांविरोधात गुन्हा दाखल करण्यात आला.
शहरातील महेश नगर भागातील रहिवासी पत्रकार विकास चव्हाण यांच्या पत्नी व संशयित आरोपी गिरीश पाटील यांची पत्नी परिसरातील भंडाऱ्यात सोबत जेवणाला गेल्यानंतर संशयित गिरीशने जुना वाद उकरून काढला. ‘तू हिच्या सोबत जेवणाला का गेली, असा जाब त्याने आपल्या पत्नीला विचारला. त्यावेळी विकास चव्हाण यांच्या पत्नीने गिरीश पाटील यांना, दादा तुम्ही अस का बोलताय? असे विचारले असता गिरीशने जुना वाद उकरून काढत त्यांना शिविगाळ केली. तसेच विकास चव्हाण यांच्या पत्नीच्या हातातील मोबाईल हिसकावला.
महिलेने पत्रकार असलेल्या पती विकास चव्हाण यांना हा प्रकार कळवताच ते घरी आले व त्यांनी संशयित गिरीशला जाब विचारला असता त्याने पत्रकार विकास चव्हाण यांनाही शिविगाळ केली. चव्हाण हे पत्नीसह पोलिसात तक्रार देण्यासाठी गेले मात्र पुन्हा वाद वाढायला नको म्हणून त्यांनी तक्रार न देता घर गाठले.
पोलीस स्टेशनला तक्रार देण्यास गेल्याचा राग मनात धरत गिरीश पाटील याने गुंड प्रवृत्तीच्या लोकांशी बोलावून घेत पत्रकार विकास चव्हाण, त्यांचे शालक विजय मिस्तरी व त्यांच्यासोबतचा हेमंत लोहार यास शिविगाळ करीत मारहाण केली. गिरीश पाटीलसह युवराज राठोड, राहुल गोसावी, डिगा सरोदे यांनी विजय मिस्तरी याच्या डोक्यात वीट मारत गंभीर जखमी केले. तसेच पत्रकार विकास चव्हाण, हेमंत लोहार यांनाही मारहाण केली.
याप्रकरणी विवाहितेच्या फिर्यादीवरून संशयित गिरीश पाटील, युवराज राठोड, राहुल गोसावी, डिगा सरोदे यांच्याविरोधात विविध कलमांतर्गत गुन्हा दाखल करण्यात आला. संशयित आरोपी पसार झाले असून पोलिसांकडून त्याचा कसून शोध सुरू करण्यात आला आहे.
