वनविभागाची कारवाई
जळगाव ( प्रतिनिधी ) – वनविभागाच्या परवानगीविना सागवान लाकडाची तस्करी करून त्याद्वारे फर्निचर बनवणार्या दुकानांवर वनविभागाने छापेमारी करीत एक लाख रुपये किंमतीच लाकुड व मुद्देमाल जप्त केला. तसेच दोघांविरुद्ध गुन्हा दाखल करण्यात आल्यानंतर खळबळ उडाली आहे.
छापेमारीने उडाली खळबळ
यावल शहरातील शेख असलम शेख असगर (मुन्शी फर्निचर) येथे वन कर्मचार्यांनी धाड टाकली. यावेळी विना परवाना अवैध साग नग ५ तसेच रंधा मशीन १ असा एकूण २१ हजार ९८४ रूपये किंमतीचा मुद्देमाल जप्त करण्यात आला.
किनगाव येथील रामचंद्र पाटील यांच्या फर्निचर दुकानातून दरवाजा फालके ८, पलंग २, सोफा सेट १, साग नग ७२, चौरंग ४, तसेच लाकूड कट्टर मशीन एक असा एकूण ७५ हजारांचा माल जप्त करण्यात आला.
ही कारवाई मुख्य वनसरंक्षक ऋषिकेश रंजन यांच्या मार्गदर्शनाखाली यावल उपवनसंरक्षक जमीर शेख, यावल पूर्व वनपरिक्षेत्र अधिकारी अजय बावणे, यावल पूर्व वनपरीक्षेत्र अधिकारी सुनील भिलावे यांच्या नेतृत्वाखाली वनपाल रवींद्र तायडे, वनपाल राजेंद्र खर्चे, वनरक्षक भैय्यासाहेब गायकवाड, अनिल पाटील, वाहन चालक सुनील पाटील यांनी संयुक्तरीत्या केली.
