अमळनेर शहरातील घटना
अमळनेर (प्रतिनिधी) : येथील प्रसिद्ध मंगळग्रह मंदिर येथे दर्शनासाठी गेलेल्या दांपत्याला चोरट्यांनी चांगलाच हिसका दाखविला. महिलेच्या गळ्यातील सोन्याची चैन अज्ञात चोरट्यांनी लांबवल्याची घटना घडली असून अमळनेर पोलीस स्टेशनला गुन्हा दाखल करण्यात आला आहे.
सेवानिवृत्त असलेले नारायण वामन खडके (वय ६९, रा.पटवारी कॉलनी, अमळनेर) हे त्यांची पत्नी जयश्री यांचेसह २५ जुलै रोजी दुपारी दीड वाजेच्या सुमारास शहरापासून जवळ असलेल्या मंगळग्रह मंदिर येथे दर्शनासाठी गेले होते. त्या ठिकाणी अज्ञात चोरट्याने जयश्री खडके यांच्या गळ्यातील १८ हजारांची सोन्याची चैन ओढून पसार झाल्याची घटना घडली.
दरम्यान या प्रकरणी नारायण खडके यांनी शुक्रवारी २८ जुलै रोजी अमळनेर पोलीस स्टेशन गाठून दुपारी २ वाजेच्या सुमारास फिर्याद दाखल केली आहे. तपास पोहेकॉ सुनील पाटील करीत आहेत.
