अमळनेर (प्रतिनिधी ) – नवजात अर्भकाला (एक दिवसाच्या मुलीला) अमळनेर बसस्थानकातील शौचालयाजवळ निर्दयीपणे कचऱ्यात फेकून दिल्याची घटना ३१ ऑक्टोबररोजी घडली होती. पोलिसांनी सहा तासात या संशयित मातेचा शोध लावला असून काल या मातेच्या बापाचा हृदयविकाराच्या झटक्याने मृत्यू झाला आहे.
अमळनेर येथील बसस्थानकावरील शौचालयाजवळ एक दिवसाच्या मुलीला फेकल्याने डुकरे तिचे लचके तोडत असतानाच प्रवाशांना तिचा केविलवाणा टाहो ऐकून आला. त्यांचेही काळजी ते दृष्य पाहून पिळवटून गेले. त्यांनी एसटी कर्मचाऱ्यांच्या मदतीने बाळाला ग्रामीण रुग्णालयात दाखल केले. त्यानंतर जळगाव येथे हलवण्यात आले.
सहा तासातच पो नि जयपाल हिरे, एपीआय मच्छीन्द्र दिवे यांच्या पथकाने गर्भवती महिला कोणकोणत्या दवाखाण्यात तपासायला आल्या होत्या याची चौकशी केली. यातून संशयित महिलेचा छडा लावला. अमळनेर ग्रामीण रुग्णालयात शनिवारी तालुक्यातील चांदणी कुऱ्हे येथील विद्याबाई महेंद्रसिंग पाटील ही महिला नातेवाईकांसोबत पोट दुखते म्हणून तपासणीसाठी आली होती. ती गरोदर असल्याने व आधीही तिचे सिझर झाले असल्याने जोखीम नको म्हणून तिला धुळे जिल्हा रुग्णालयात जाण्याचा सल्ला देण्यात आला होता. त्यानुसार धुळ्याला तिचे सीझर करून प्रसूती करण्यात आली.
धुळ्यात या महिलेला मुलगी झाली. त्यानंतर तिने व तिच्या वडिलांनी धुळे जिल्हा रुग्णालयात डिस्चार्जसाठी गोंधळ घातला होता. काही वेळाने त्यांनी डॉक्टर व कर्मचाऱ्यांची नजर चुकवून पळ काढला व अमळनेर बसस्थानकावर आल्यावर मुलीला निर्दयीपणे शौचालयाजवळ फेकून दिले होते.
अमळनेर पोलीस स्टेशनला जिवंत अर्भक फेकल्याचा गुन्हा दाखल झाला आहे. पोलिसांनी आरोपी महिलेला अवघ्या सहा तासात निष्पन्न केले. मात्र तिचे सीझर झाले असल्याने तिला ग्रामीण रुग्णालयात दाखल केले आहे.
दरम्यान आरोपी महिलेचे वडील दत्तू पाटील हे दारू पित होते. ते अस्वस्थ अवस्थेत पडलेले आढळून आल्याने गावकऱ्यांनी त्यांना ग्रामीण रुग्णालयात दाखल केले. उपचार सुरू असताना त्यांचा हृदय विकाराने मृत्यू झाल्याचे डॉक्टरांनी सांगितले.
