नवी दिल्ली ( वृत्तसंस्था ) – इटलीतील मिलान शहरात रविवारी लहान विमान धावपट्टीवर उतरण्याआधी दुमजली इमारतीला धडकले. यात लहान मुलासह आठ जणांचा दुर्दैवी मृत्यू झाला. विमानाची धडक झाल्यानंतर इमारतीला आग लागली. या इमारतीजवळच्या वाहनांनाही आगीची झळ बसली.
अग्निशमन दलाच्या जवानांनी घटनास्थळी धाव घेतली. अपघातात विमानातील प्रवाशांशिवाय इतर कोणतीही जीवितहानी झालेली नाही. विमान धडकलेली इमारत रिकामी होती. त्यामुळे सुदैवाने मोठ्या प्रमाणात जीवितहानी झाली नाही.इमारत मेट्रो रेल्वे स्टेशनच्या जवळ होती. इमारतीजवळ उभ्या असलेल्या वाहनांमध्ये चालक अथवा प्रवासी नव्हता.
या लहान विमानातील पायलटसह आठ प्रवाशांचा मृत्यू झाला. विमानातील प्रवासी फ्रान्सचे नागरिक असण्याची शक्यता आहे. विमानातील प्रवाशांशिवाय इतर कोणाचाही यामध्ये मृत्यू झालेला नाही. मिलानजवळील सान डोनाटो मिलानीज या लहान शहरात हा अपघात झाला. अपघातग्रस्त विमानाने मिलानच्या लिनेट विमानतळ आणि इटलीतील सारिदिनिया बेटादरम्यान उड्डाण घेतले होते.
