धरणगाव (प्रतिनिधी) – तालुक्यातील चांदसर येथे प्राथमिक आरोग्य केंद्र व्हावे, अशी मागणी सातत्याने ग्रामस्थांमधून केली जात होती. अखेर त्यास यश आले आहे. प्राथमिक आरोग्य केंद्रासाठी आवश्यक जागा उपलब्ध झाल्याने निधी मंजूर झाला. मंजूर झालेल्या आरोग्य केंद्र इमारतीचे भूमिपूजन महाराष्ट्र राज्याचे पाणीपुरवठा व स्वच्छता मंत्री तथा पालकमंत्री जळगाव ना. गुलाबरावजी पाटील यांच्या हस्ते करण्यात आले.
सर्वांना निरोगी जगणे शक्य व्हावे एवढी प्रगती विज्ञानामुळे झालेली आहे. त्यामुळे आधुनिक जगात विशेषतः एकविसाव्या शतकात आरोग्याचा हक्क हा मूलभूत मानला जातो. नागरिकांना योग्य सोयी सुविधा औषधोपचाराची गरज असते त्यांना ते न परवडल्यामुळे बळी जाऊ नये यासाठी सदर आरोग्य केंद्र आपण महाराष्ट्राचे पाणीपुरवठा व स्वच्छता मंत्री तथा पालकमंत्री जळगाव ना. गुलाबरावजी पाटील यांच्याकडून प्राधान्याने मंजूर करून आणले. असे प्रतिपादन जि.प.सदस्य प्रताप पाटील यांनी याप्रसंगी केले.
तालुक्यातील चांदसर येथील ग्रामस्थ व महिलांना विविध आरोग्यविषयक सेवा-सुविधांसाठी धरणगाव किंवा जळगाव येथे जावे लागत होते. त्यामुळे गावातच प्राथमिक आरोग्य केंद्र होण्याची मागणी ग्रामस्थांमधून केली जात होती. या मागणीचा पाठपुरावा जिल्हा परिषद सदस्य प्रतापभाई गुलाबराव पाटील व लोकनियुक्त सरपंच सचिन जगन्नाथ पवार यांनी सातत्याने करत चांदसर येथे प्राथमिक आरोग्य केंद्र मंजूर करून आणल्याबद्दल ग्रामस्थ समाधान व्यक्त करत आहेत. यावेळी उपस्थित शिवसेना जिल्हा प्रमुख विष्णू भंगाळे.संजय पाटील,प्रेमराज पाटील.मुकुंदराव नंनवरे.उपस्थित होते
