जळगाव (प्रतिनिधी) –जिल्हाधिकारी कार्यालय जळगाव येथे गॅस कंपनीच्या व्यवस्थापकांसोबत झालेल्या बैठकीनुसार व जिल्हाधिकारी जळगाव यांच्या आदेशाने आता जिल्ह्यातील ग्रामीण भागातही,गाव खेड्यावर घरगुती वापराचे गॅस सिलींडर नि:शुल्क घरपोच करून मिळणार आहे. अशी माहिती महाराष्ट्र शासनाच्या राज्य ग्राहक संरक्षण परिषदेवरील अशासकिय सदस्य तथा ग्राहक पंचायतीचे जळगाव जिल्हा अध्यक्ष विकास महाजन यांनी दिलेली आहे.
जळगाव जिल्ह्यातील ग्रामीण भागात खेड्यावर घरगुती वापराचे गॅस सिलिंडर घरपोच करण्यासाठी वितरक 14.2 किलो वजनाच्या सिलिंडरसाठी 22 ते 35 रुपये आकारत होते. महाराष्ट्रात जळगाव जिल्ह्यासाठी सर्व प्रथम ग्रामीण ग्राहकोपयोगी असा हा धाडसी निर्णय जिल्हाधिकारी यांनी घेतलेला आहे. याबद्दल अ.भा.ग्राहक पंचायत जळगाव जिल्ह्याच्यावतीने जिल्हा अध्यक्ष विकास महाजन यांनी जिल्हाधिकारी अभिजीत राऊत यांचे आभार मानले आहेत.
ग्राहक संरक्षण कायदा 2019 लागू झाल्यानंतरचा हा एक मोठा निर्णय असुन यामुळे ग्रामीण ग्राहकांचे 14.2 किलो वजनाच्या प्रती सिलींडर मागे 22 ते 35 रुपये वाचणार आहेत. ग्राहकाने गॅस सिलिंडर गोडाऊन मधून घेतल्यास 14.2 किलो वजनाच्या सिलिंडरसाठी रु.27.60 आणि 5 किलो वजनाच्या सिलिंडरसाठी रु.13.80 सेल रिटेल प्राइसमधून वजा करावे. असेही विकास महाजन यांनी म्हटलेले आहे.
जिल्ह्यातील ग्रामीण भागातील वितरकांनी सिलिंडरच्या ठरवून दिलेल्या आधारभूत किमती पेक्षा जास्त किंमत आकारल्यास जीवनावश्यक कायदा 1955 मधील तरतूदींचा भंग केला म्हणून कारवाई होऊ शकते.असेही जिल्हाधिकारी यांच्या आदेशात नमुद केलेले आहे.
