डोक्याला व हाताला दुखापत; उपचारादरम्यान शुद्धीवर आल्यानंतर दिली फिर्याद
पारोळा (प्रतिनिधी) :- भोकरखेडजवळ अज्ञात चारचाकी वाहनाने दुचाकीला मागून जोरदार धडक दिल्याने दुचाकीस्वार गंभीर जखमी झाल्याची घटना घडली होती. या अपघातात दुचाकीस्वाराच्या डोक्याला व हाताला दुखापत झाली असून, उपचारानंतर शुद्धीवर आल्यानंतर त्यांनी पोलिसांत फिर्याद दिली आहे. याप्रकरणी पारोळा पोलिस ठाण्यात अज्ञात चारचाकी वाहनचालकाविरुद्ध गुन्हा दाखल करण्यात आला आहे.
पोलिसांकडून मिळालेल्या माहितीनुसार, सूर्यभान गंगाराम पाटील (वय ४५, व्यवसाय शेती, रा. पळासखेडा, ता. पारोळा, जि. जळगाव) हे १५ सप्टेंबर २०२६ रोजी सकाळी सुमारे ११ वाजता आपल्या दुचाकीने शेतात जात होते. त्यांची दुचाकी क्रमांक MH 19 BB 4613 होती.
दरम्यान, भोकरखेडजवळ त्यांच्या मागून येणाऱ्या MH 19 CX 3762 क्रमांकाच्या छोट्या चारचाकी वाहनावरील चालकाने दुचाकीला मागून जोरदार धडक दिली. या धडकेमुळे सूर्यभान पाटील दुचाकीवरून खाली पडले. त्यांच्या डोक्याला व हाताला दुखापत झाली आणि डोक्यातून रक्तस्राव सुरू झाला. त्यानंतर ते काही वेळ बेशुद्ध पडले.
अपघातानंतर नागरिकांनी त्यांना उपचारासाठी धरणगाव येथील प्राथमिक आरोग्य केंद्रात दाखल केले. तेथून पुढील उपचारासाठी धुळे येथील श्री विघ्नहर्ता हॉस्पिटलमध्ये हलविण्यात आले. त्यांच्यावर उपचार सुरू असताना डोक्यावर शस्त्रक्रियाही करण्यात आली. प्रकृतीत सुधारणा होऊन शुद्धीवर आल्यानंतर त्यांनी पोलिसांना घडलेल्या घटनेची माहिती दिली.
त्यांच्या फिर्यादीवरून पारोळा पोलिस ठाण्यात गुन्हा रजिस्टर क्रमांक ३७३/२०२६ अन्वये भारतीय न्याय संहितेच्या कलम २८१, १२५(अ), १२५(ब) तसेच मोटार वाहन कायदा कलम १८४ प्रमाणे गुन्हा दाखल करण्यात आला आहे.
या प्रकरणाचा पुढील तपास पोलीस हवालदार/४२२ डॉ. शरद पाटील, नेमणूक पारोळा पोलिस ठाणे, करीत आहेत. गुन्ह्यातील आरोपी वाहनचालक अद्याप अटक झालेला नसल्याची नोंद पोलिसांच्या अहवालात आहे.
