शनिपेठ पोलीस ठाण्यात गुन्हा दाखल
जळगाव (प्रतिनिधी) – युट्यूबवर पेन्शन कार्डचे बनावट आमिष दाखवून सदाशिव नगरातील एका ५९ वर्षीय व्यक्तीची तब्बल ३ लाख ८४ हजार रुपयांची ऑनलाइन आर्थिक फसवणूक केल्याचा प्रकार उघडकीस आला आहे. या प्रकरणी पीडिताच्या तक्रारीवरून शनिपेठ पोलीस ठाण्यात अज्ञात सायबर भामट्याविरुद्ध भारतीय न्याय संहिता (BNS) आणि माहिती तंत्रज्ञान कायद्यान्वये (IT Act) गुन्हा दाखल करण्यात आला आहे.
मिळालेल्या माहितीनुसार, सदाशिव नगर भागातील रहिवासी आणि गोदावरी अभियांत्रिकी महाविद्यालयात खासगी नोकरीस असलेले राजेंद्र पाटील (वय ५९) यांना युट्यूबवर अज्ञात व्यक्तीने पेन्शन कार्डची ऑनलाइन ऑफर देण्याचे सांगून एका लिंकद्वारे संपर्क साधला. त्यानंतर बँक खात्याची गोपनीय माहिती मिळवून तसेच पैशांचे आभासी परतावे दाखवून पाटील यांच्याकडून एकूण ३ लाख ८४ हजार रुपये ऑनलाइन ट्रान्सफर करून घेतले. फसवणूक झाल्याचे लक्षात आल्यानंतर त्यांनी पोलिसात धाव घेतली.
या प्रकरणी राजेंद्र पाटील यांच्या तक्रारीवरून शनिपेठ पोलीस ठाण्यात BNS कलम ३१८(४) आणि आयटी ॲक्ट कलम ६६(डी) नुसार गुन्हा नोंदवण्यात आला आहे. या प्रकरणाचा पुढील तपास पोलीस निरीक्षक विशाल जयस्वाल करत असून संशयित आरोपीचा शोध सुरू आहे.
